სინამდვილეში, ამ ყალბი სითამამის უკან შიში იმალება. მათი უტიფარი განცხადებები კი, პროტესტის მუხტს კიდევ უფრო გააბრაზებს და გააღვივებს, განსაკუთრებით თავისუფალ და თავისუფლების მოყვარულ ახალგაზრდებში,- ასე გამოეხმაურა საპარლამენტო ფრაქცია „ერთიანი ნაციონალური მოძრაობის“ თავმჯდომარე თინა ბოკუჩავა კახა კალაძის მხრიდან „ფორმულას“ ჟურნალისტზე სიტყვიერ შეურაცხყოფის მიყენებას.

როგორც ბოკუჩავა განმარტავს, შიში გამოჩნდა „ივანიშვილის სახეზეც, როცა მან რუსთაველზე შეკრებილ საზოგადოებას“ მიმართა.

„სინამდვილეში, ამ ყალბი სითამამის უკან შიში იმალება. ეს დავინახეთ მათ შორის არ შემდგარი დიქტატორის, შეშინებული ივანიშვილის სახეზე, რომელმაც დაძალებით ჩამოყვანილ საჯარო მოხელეებს რუსთაველზე მიმართა. ასევე, დღეს პარლამენტი საერთოდ ვერ შეიკრიბა, რადგან მხდალ, მოღალატეებს, იმ 83 მოღალატეს, რომელმაც რუსულ კანონს მხარი დაუჭირა, საერთოდ აღარ სურს გამოჩენა და გარკვეული ტაიმაუტი აიღეს, რადგან ფიქრობენ, რომ ამით საზოგადოებას ბრაზი გადაუვლის, მაგრამ მათ უტიფარ განცხადებებში შიში იმალება, რაც კიდევ უფრო გააბრაზებს და გააღვივებს პროტესტის მუხტს, განსაკუთრებით, თავისუფალ და თავისუფლების მოყვარულ ახალგაზრდებში“,- განაცხადა თინა ბოკუჩავამ.

აღნიშნულ ინფორმაციას „ერთიანი ნაციონალური მოძრაობა“ ავრცელებს.