ირაკლი ქადაგიშვილი ე.წ. ლგბტ პროპაგანდის საწინააღმდეგო ცვლილებებზე - როცა ვსაუბრობთ პროპაგანდის აკრძალვაზე, საუბარია იმაზე, რომ ეს არ უნდა გახდეს ქცევის ნიმუში, რადგან იწვევს ადამიანის მენტალურ და ფიზიო-ბიოლოგიურ დონეზე დეგრადირებას

მთავარია იმის დანახვა, რამდენად საჭირბოროტოა საკითხი, რაზეც კონსტიტუციურ კანონპროექტშია საუბარი, - ამის შესახებ საპროცედურო საკითხთა და წესების კომიტეტის თავმჯდომარემ ირაკლი ქადაგიშვილმა საკონსტიტუციო ცვლილებებთან დაკავშირებით საყოველთაო-სახალხო განხილვაზე განაცხადა, რომელიც თელავში გაიმართა.

ირაკლი ქადაგიშვილის შეფასებით, ევროპის განვითარებული სახელმწიფოები დემოგრაფიული კვდომის პროცესში არიან და განგაშის ზარი აქვთ შემოკრული.

„როცა ვსაუბრობთ პროპაგანდის შეზღუდვასა და აკრძალვაზე, საუბარია იმაზე, რომ ეს არ უნდა გახდეს ქცევის ნიმუში, რადგან იწვევს ფიზიო-ბიოლოგიურ დონეზეც ადამიანის დეგრადირებას და მენტალურ დეგრადირებასაც. ამიტომ დღეს ევროპა ძალიან ხმამაღლა ლაპარაკობს იმაზე,რომ რაღაცნაირად ამ პრობლემას უნდა მოევლოს“, - განაცხადა ირაკლი ქადაგიშვილმა.