პარლამენტის უკანა შესასვლელთან არსებული სკვერი სამართალდამცველებმა დაიკავეს. ახლა ისინი ცდილობენ, რომ პარლამენტის უკანა ტერიტორია მოქალაქეებს სრულად დაატოვებინონ. ისინი აქციის მონაწილეებს მოუწოდებენ, პარლამენტის წინ გადაინაცვლონ. აქციის მონაწილეები სკანდირებენ: "მონებო".

პარლამენტის მიმდებარე ტერიტორიაზე მობილიზებული არიან სპეცრაზმელები, ადგილზე განლაგებულია ასევე წყლის ჭავლის მანქანა.

შინაგან საქმეთა სამინისტრომ საკანონმდებლო ორგანოს შენობის მიმდებარე ტერიტორიაზე მყოფ პირებს მოუწოდა, არ მოახდინონ პარლამენტის შესასვლელების ბლოკირება, ასევე, თავი შეიკავონ კანონსაწინააღმდეგო და ძალადობრივი ქმედებებისგან.

აქცია პარლამენტთან 12 მაისის 22:00 საათიდან მიმდინარეობს. აქციის ორგანიზატორები და მონაწილეები საჯაროდ აცხადებენ, რომ ისინი არ მისცემენ დეპუტატებს 13 მაისს, 09:00-ზე დაგეგმილ პარლამენტის იურიდიული კომიტეტის სხდომაზე დასწრების და მასში მონაწილეობის საშუალებას.