მე არ ვარ ეკონომისტი, არ ვარ საფინანსო მიმართულების ექსპერტი, მაგრამ შემიძლია გითხართ, რომ ეს არის თავიდან ბოლომდე სუფთა პოლიტიკური სპეკულაცია. მე რამდენადაც გადავამოწმე და მოვიკითხე, ბევრჯერ ყოფილა ამგვარი გაუფასურება ამ ბანკების ფასიანი ქაღალდებისა წინა წლებშიც და შემდეგ საწყის პოზიციებს უბრუნდებოდა ეს ფასი, - ამის შესახებ ფრაქცია „ქართული ოცნების“ თავმჯდომარის პირველმა მოადგილემ, გია ცაგარეიშვილმა, ლონდონის საფონდო ბირჟაზე "საქართველოს ბანკისა" და "თიბისი" ბანკის აქციების შემცირებასთან დაკავშირებით განაცხადა.

მისი თქმით, არსებობს სფეროები, სადაც პოლიტიკოსები არ უნდა შეიჭრან, თუმცა, ამის მიუხედავად ისინი „მიადგნენ ეროვნულ ვალუტას და ცდილობენ, პოლიტიკური სპეკულაციით აპოკალიფსური სურათი დახატონ“.

დეპუტატის განცხადებით, დღევანდელ საფინანსო სისტემას არაფერი ემუქრება.

"ბანკებს და მათ აქციონერებს მინდა, რომ მხოლოდ წარმატება ვუსურვო, მათ შორის, ლონდონის საფონდო ბირჟაზეც. ვფიქრობ, ეს არის სუფთა წყლის პოლიტიკური სპეკულაცია, რომელიც, შესაბამისად, უკვე აისახა ლარის კურსზე და ასეთი ვარდნები ჩვენ ეროვნული ვალუტის გვახსოვს - ერთდღიანი, ორდღიანი და სამდღიანი რყევები, შემდეგ ლარი უკანასკნელი წლების პრაქტიკას თუ გადავავლებთ თვალს, უბრუნდებოდა თავის პოზიციებს, ანუ ინაზღაურებდა დანაკარგს და ისევ მყარდებოდა. დარწმუნებით შემიძლია გითხრათ, რომ დღევანდელ საფინანსო სისტემას არაფერი ემუქრება ამ ქვეყანაში, აკონტროლებს ამ პროცესებს ეროვნული ბანკი თავისი კომპეტენტური გუნდით, კომპეტენტური ხელმძღვანელით. ჩვენ ვენდობით ეროვნულ ბანკს და აქედან გამომდინარე, არავითარი საპანიკო აქ არ არის და რაც უფრო ნაკლებად ჩაერთვებიან ჩემი ე.წ. კოლეგები სხვადასხვა ფლანგიდან და ისპეკულანტებენ ამ თემაზე, მათ შორის, ჭკუიდან გადაიყვანენ საზოგადოებას იმასთან დაკავშირებით, რომ რაღაც უბედურება სჭირს ახლა ქართულ ეკონომიკას, ფინანსებს და საბანკო სექტორს, მით უკეთესი იქნება მათთვის, მათივე ჯიბეებისთვისაც და ჩვენი საზოგადოებისთვის. ეს ის სფეროა, სადაც არ უნდა შეიჭრან ადამიანები, მაგრამ სამწუხაროდ, არიან ქართულ პოლიტიკაში იმ რანგის პოლიტიკოსები, რომლებმაც საერთოდ ყველანაირი ზღვარი გადალახეს და იქ შევიდნენ და იქ ჩარჩნენ, სადაც მათი ადგილი არასდროს ყოფილა. ახლა მიადგნენ ჩვენს ვალუტას, ბანკო სისტემას და აპოკალიფსური ბოდვითი თეორიებით აჭრელდა სოციალური ქსელი, თითქოს ჩამოვიქეცით და დავიღუპეთ და ამის არავითარი ნიშანი არ ჩანს, კიდევ ერთხელ მინდა გითხრათ სრული პასუხისმგებლობით. ჩვენ წინა თვეში თითქმის 8%-იანი ზრდა გვქონდა მშპ-ის", - განაცხადა ცაგარეიშვილმა, რომლის კომენტარსაც “ქართული ოცნება“ ავრცელებს.

საქართველოს პრეზიდენტი სალომე ზურაბიშვილი ტელეფონით ევროპული საბჭოს პრეზიდენტს, შარლ მიშელს ესაუბრა.

პრეზიდენტის ადმინისტრაციის ინფორმაციით, საუბარი შეეხო ქვეყანაში მიმდინარე მოვლენებს.

საუბრის შინაარსის შესახებ კონკრეტული ინფორმაცია არ ვრცელდება.

საქართველოს საპატრიარქო გერმანიის ბუნდესტაგის საგარეო ურთიერთობათა კომიტეტის თავმჯდომარე, მიხეილ როთისგანცხადებას გაუგებარს, უადგილოს და მიუღებელს უწოდებს.

საპატრიარქოს განცხადების თანახმად, მიხაილ როთმა თავისი განცხადებით ეკლესია გამიჯნა ახალგაზრდობისა და ქვეყნის ნათელი მომავლისაგან, რაც „არის ევროპული ქვეყნის სახელმწიფო მოხელისაგან სამწუხარო მცდელობა ეკლესიის სტიგმატიზაციისა და თანაც ასეთ რთულ ვითარებაში“.

„გუშინ საქართველოში ევროპის ქვეყნებიდან ჩამოსულ სტუმართა შორის იმყოფებოდა გერმანიის ბუნდესტაგის საგარეო ურთიერთობათა კომიტეტის თავმჯდომარე, მიხეილ როთი, რომლის განცხადებამაც უარყოფითი გამოხმაურება გამოიწვია საზოგადოებაში, განსაკუთრებით - მორწმუნეთა შორის. მან თავის განცხადებაში ბრძანა: „როგორ უნდა შექმნათ ნათელი მომავალი საქართველოსთვის ახალგაზრდა თაობის გარეშე?! მხოლოდ მართლმადიდებელი ეკლესიით, რომელიც მმართველი პარტიის ყველაზე მჭიდრო მოკავშირეა?!“

ეკლესია მუდმივად ცდილობს საზოგადოებაში დაპირისპირების აღმოფხვრას. მან კი ამ განცხადებით ეკლესია გამიჯნა ახალგაზრდობისა და ქვეყნის ნათელი მომავლისაგან. ეს არის ევროპული ქვეყნის სახელმწიფო მოხელისაგან სამწუხარო მცდელობა ეკლესიის სტიგმატიზაციისა და თანაც ასეთ რთულ ვითარებაში.

გვსურს, ვუპასუხოთ ბატონ მიხეილს, რომ ჩვენ არ ვყოფთ არც ახალგაზრდებს და არც ასაკოვან ადამიანებს იმის მიხედვით, ვინ რა პლატფორმაზე დგას. ჩვენი ახალგაზრდები ეკლესიის წევრები არიან, მის წიაღში იყვნენ და არიან სხვადასხვა პოლიტიკური ძალის წარმომადგენლებიც. ეს ჩვენთვის ბუნებრივი მდგომარეობაა.

ამდენად, ბატონი მიხეილის განცხადება სრულიად გაუგებარი, უადგილო და მიუღებელია”, - წერია განცხადებაში.

საქართველოს პარლამენტის თავმჯდომარე შალვა პაპუაშვილი ეუთოს მოქმედ თავმჯდომარეს, მალტის საგარეო, ევროპულ საქმეთა და ვაჭრობის მინისტრს იან ბორგს შეხვდა. ამის შესახებ ინფორმაციას საქართველოს პარლამენტის პრესსამსახური ავრცელებს.

მათივე ცნობით, პარლამენტის თავმჯდომარემ იან ბორგს მადლობა გადაუხადა ეუთოს მიერ საქართველოს განვითარებაში შეტანილი წვლილისთვის და ეუთოს ინსტიტუტებთან მჭიდრო თანამშრომლობის გაგრძელების მზაობა დააფიქსირა.

იან ბორგის განცხადებით, ეუთო მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას, ასევე, რუსეთის მიერ ოკუპირებული რეგიონების არაღიარების პოლიტიკას.

მხარეებმა ისაუბრეს საქართველო-ეუთოს ურთიერთობებზე, აგრეთვე, სამხრეთ კავკასიის რეგიონში მიმდინარე მოვლენებსა და საქართველოს, როგორც აზერბაიჯანსა და სომხეთს შორის მედიატორის როლზე.

საქართველოს პრემიერ-მინისტრი ირაკლი კობახიძე ეუთოს მოქმედ თავმჯდომარეს, მალტის საგარეო, ევროპულ საქმეთა და ვაჭრობის მინისტრს, იან ბორჯს შეხვდა.

საქართველოს მთავრობის ადმინისტრაციის პრესსამსახურის ინფორმაციით, მთავრობის მეთაურმა ვიზიტის მნიშვნელობას გაუსვა ხაზი და კიდევ ერთხელ დაადასტურა ეუთოსთან მჭიდრო თანამშრომლობის მზაობა მალტის თავმჯდომარეობის პერიოდში.

"საუბარი შეეხო მიმდინარე წლის საპარლამენტო არჩევნებს საქართველოში. მთავრობის მეთაურის თქმით, საქართველოს ხელისუფლებისთვის განსაკუთრებული მნიშვნელობის პრიორიტეტია გამჭვირვალე, თავისუფალი და სამართლიანი არჩევნების ჩატარება და მზადაა, ამჯერადაც შეუწყოს ხელი საერთაშორისო დამკვირვებლების, მათ შორის ეუთოს ინსტიტუტების წარმომადგენელთა, ფართო ჩართულობას", - აღნიშნულია ინფორმაციაში.

შეხვედრისას ასევე ყურადღება დაეთმო მალტასთან ორმხრივ ურთიერთობებს. პრემიერ-მინისტრმა მადლობა გადაუხადა მალტის მხარეს ეუთოს სხვადასხვა ფორმატში საქართველოს სუვერენიტეტის, ტერიტორიული მთლიანობის და არაღიარების პოლიტიკის მხარდაჭერისთვის.