სამძებრო-სამაშველო ჯგუფებმა იმ ვერტმფრენის ჩამოვარდნის ადგილი დაადგინეს, რომელშიც 9 ადამიანი, მათ შორის ირანის პრეზიდენტი ებრაჰიმ რაისი და საგარეო საქმეთა მინისტრი, ჰოსეინ ამირ აბდოლაჰიანი იმყოფებოდა, - ინფორმაციას CNN-ი ირანულ მედიაზე დაყრდნობით ავრცელებს.

მათივე ინფორმაციით, მაშველები შემთხვევის ადგილს უახლოვდებიან.

ამასთან, ირანული მედია არ აკონკრეტებს, რომელ ტერიტორიაზეა საუბარი.

მანამდე გავრცელდა ინფორმაცია, რომ სამძებრო-სამაშველო ჯგუფები მივიდნენ იმ ადგილას, სადაც თურქულმა დრონმა ირანის აღმოსავლეთ აზერბაიჯანის პროვინციის მთიან რეგიონში სითბოს წყაროს იდენტიფიცირება მოახდინა, მაგრამ ვერტმფრენის ჩამოვარდნის ადგილი ვერ აღმოაჩინეს.

ცნობისთვის, ირანის წითელი ნახევარმთვარის ხელმძღვანელის პირ-ჰოსეინ კოლივანდის განცხადებით, ვერტმფრენის ჩამოვარდნის ზონაში, ირანის აღმოსავლეთ აზერბაიჯანის პროვინციის სოფელ ტავილთან, სულ მცირე 73 სამაშველო ჯგუფი იმყოფება.