აშშ-ის მიერ საავიაციო ინდუსტრიის წინააღმდეგ დაწესებული სანქციები ქვეყნებს ზიანს აყენებს, - ამის შესახებ რუსეთის საგარეო საქმეთა მინისტრმა, სერგეი ლავროვმა ირანის პრეზიდენტის, ებრაჰიმ რაისის ავიაკატასტროფაში დაღუპვის შესახებ საუბრისას განაცხადა.

„ამერიკელები ამას უარყოფენ, მაგრამ სხვა ქვეყნები, რომლებსაც ამერიკის შეერთებული შტატები სანქციებს უწესებს, ამერიკული აღჭურვილობისთვის, მათ შორის ავიაციისთვის, სათადარიგო ნაწილებს არ იღებენ. საუბარია რიგითი მოქალაქეებისთვის ზიანის განზრახ მიყენებაზე, რომლებიც სატრანსპორტო საშუალებებს იყენებენ და როდესაც სათადარიგო ნაწილების მიწოდება არ ხდება, ეს უსაფრთხოების დონის დაქვეითებას პირდაპირ უკავშირდება“, - განაცხადა სერგეი ლავროვმა.

მისივე თქმით, დასავლეთის განცხადებები იმის შესახებ, რომ სანქციების მიზანი შესაბამისი სახელმწიფოების ხელისუფლებების ქცევების გამოსწორებაა, სიცრუეა და ეს იმას ადასტურებს, რომ დასავლეთის ნდობა არ შეიძლება.

ცნობისთვის, გუშინ, ირანის ყოფილმა საგარეო საქმეთა მინისტრმა, ჯავად ზარიფიმ განაცხადა, რომ ებრაჰიმ რაისისა და ჰოსეინ ამირ-აბდოლაჰიანის ავიაკატასტროფაში დაღუპვის ერთ-ერთ მიზეზი აშშ-ის მიერ ირანისთვის დაწესებული სანქციები იყო.