საბერძნეთის პრემიერ-მინისტრს შვეიცარიაში გასამართ სამშვიდობო სამიტში მონაწილეობის დადასტურებისთვის მადლობა გადავუხადე, - ამის შესახებ უკრაინის პრეზიდენტი, ვოლოდიმირ ზელენსკი აცხადებს.

ვოლოდიმირ ზელენსკის ცნობით, საბერძნეთის პრემიერ-მინისტრთან, კირიაკოს მიცოტაკისთან სატელეფონო საუბარი გამართა და მასთან შვეიცარიაში დაგეგმილი სამშვიდობო სამიტი განიხილა.

„ასევე, ჩვენ „დიდი შვიდეულის“ სახელმწიფოების ვილნიუსის დეკლარაციის ფარგლებში უსაფრთხოების ორმხრივ შეთანხმებაზე მუშაობას ვაგრძელებთ“, - განაცხადა უკრაინის პრეზიდენტმა.

ვოლოდიმირ ზელენსკიმ აღნიშნა, რომ ივნისში ევროკავშირსა და უკრაინას შორის გაწევრიანების მოლაპარაკებების დაწყებას საბერძნეთი მხარს უჭერს.

შეგახსენებთ, უკრაინისთვის პირველი სამშვიდობო სამიტი შვეიცარიაში 15-16 ივნისს გაიმართება.