უკრაინის პრეზიდენტის ვოლოდიმირ ზელენსკის განცხადებით, შვეიცარიაში გასამართ სამშვიდობო სამიტში მონაწილეობა 90-მა ქვეყანამ დაადასტურა.

„ახლა მონაწილეობა უკვე 90-მა ქვეყანამ დაადასტურა და ფართო წარმომადგენლობისთვის ჩვენ მსოფლიო ლიდერებთან მუშაობას ვაგრძელებთ“, - განაცხადა ვოლოდიმირ ზელენსკიმ ესპანეთში გამართულ პრესკონფერენციაზე.

უკრაინის პრეზიდენტმა, ესპანეთის პრემიერ-მინისტრს, პედრო სანჩესს სამიტში მონაწილეობის დადასტურებისთვის მადლობა გადაუხადა და აღნიშნა, რომ პირველ გლობალურ სამშვიდობო სამიტში ესპანეთის მონაწილეობა ისტორიული მნიშვნელობის იქნება.

შეგახსენებთ, უკრაინისთვის პირველი სამშვიდობო სამიტი შვეიცარიაში 15-16 ივნისს გაიმართება.