თბილისის მერიის მხარდაჭერით, 1-ელ ივნისს ტრადიციულად ბავშვთა დაცვის საერთაშორისო დღე აღინიშნება. დღის განმავლობაში დედაქალაქის სხვადასხვა ლოკაციაზე განხორციელდება არაერთი აქტივობა, - აღნიშნულის შესახებ თბილისის მერმა, კახა კალაძემ მუნიციპალიტეტის მთავრობის სხდომაზე განაცხადა.

როგორც კალაძემ განმარტა, მთავარი ღონისძიება დაგეგმილია დედაენის ბაღში, რომლის ფარგლებშიც “ბევრი საინტერესო და განსაკუთრებული პროგრამა, პატარებისთვის გაიმართება”.

“1-ელი ივნისი შაბათი დღეა და მინდა მშობლებს, ბებია-ბაბუებს მოვუწოდო, რომ თქვენი შვილები, შვილიშვილები გამოიყვანოთ. ღონისძიების ფარგლებში, სცენაზე წარმოდგენილი იქნება „რანინას“ კონცერტი. მთელი დღის განმავლობაში ბავშვებისთვის განკუთვნილი სხვადასხვა გასართობი აქტივობა გაიმართება, მათ შორის: თოჯინების თეატრის და თითების თეატრის წარმოდგენები, სპექტაკლი „ჟოზე“, მოეწყობა სპორტულ-გასართობი ზონები, ფოტოზონა, ახალგაზრდა მეწარმეთა და საბავშვო ლიტერატურის გამოფენა-გაყიდვა, სკეიტ შოუ, ილუსტრაციების ზონა, ზღაპრის კუთხე და სხვა.

პატარების განწყობაზე ზღაპრის გმირები იზრუნებენ. ღონისძიება დაიწყება 17:00 საათზე, ხოლო საკონცერტო ნაწილი 20:00 საათზე”, - განაცხადა კალაძემ.