„საქართველოს სამედიცინო ასოციაციების გაერთიანების“ ინფორმაციით, გამოიკვეთა კლინიკები, რომლებიც დიდი ალბათობით ვერ დააკმაყოფილებენ AACI-ის მოთხოვნებს და ვერ შეძლებენ აკრედიტაციის მიღებას 2025 წლის 1 იანვრამდე.

ამერიკის აკრედიტაციის კომისიის - AACI საქართველოს წარმომადგენლობის ხელმძღვანელის AACI-ის ვიცე პრეზიდენტის არჩილ მორჩილაძის განცხადებით, ამ ეტაპზე გამოიკვეთა ორი-სამი კლინიკა, რომელებიც დიდი ალბათობით, ვერ შეძლებენ კრიტერიუმების შესრულებას და იქ აკრედიტაციის პროცესი შეწყდება.

მისივე განცხადებით, ასევე სასიხარულოა, რომ ბევრმა კლინიკამ გამოასწორა და შეამცირა შეუსაბამობები და აგრძელებენ მუშაობას.

„უკვე აკრედიტებულია რამდენიმე მათგანი. წლის ბოლომდე ყველას ექნება ვადა გამოასწოროს ხარვეზები. მთავარია, იყოს მენეჯმენტის მყარი გადაწყვეტილება. შეასრულონ ის რეკომენდაციები, რაც მათ მიეცათ.

AACI ამერიკა საქართველოში 50-მდე კლინიკის აკრედიტაციას ახორციელებს. თითქმის ყველა მათგანში უკვე ჩატარდა წინასწარი შეფასება და კლინიკებს მიეცათ შესაბამისი რეკომენდაციები AACI-ის სტანდარტების დასანერგად. მაისის თვიდან მიმდინარეობს ძირითადი შეფასებები, რათა კლინიკების აკრედიტაციის პროცესი 31 დეკემბრამდე დასრულდეს.

როგორც ცნობილია, მთავრობის დადგენილებით 2025 წლიდან საერთაშორისო აკრედიტაციის გარეშე კლინიკები სახელმწიფო პროგრამებში მონაწილეობას ვეღარ შეძლებენ“,-აღნიშნულია „სამედიცინო ასოციაციების გაერთიანების“ მიერ გავრცელებულ ინფორმაციაში.