პარლამენტთან „უცხოური გავლენის გამჭვირვალობის შესახებ“ კანონის მოწინააღმდეგეები არიან შეკრებილები, საიდანაც მსვლელობით მშვიდობის ხიდთან მივლენ.
როგორც ერთ-ერთმა ორგანიზატორმა, „დაფიონის“ წევრმა ზვიად ცეცხლაძემ შეკრებილებს განუცხადა, ლოზუნგი “არა რუსულ კანონს” უნდა შეიცვალოს მოწოდებით "არა რუსულ რეჟიმს!”
„დღევანდელი რეალობიდან გამომდინარე აუცილებლად მივიჩნევთ შეიცვალოს, მათ შორის, ლოზუნგი და საერთოდ ბრძოლის წესიც, რადგან ჩვენ დემოკრატიულ ქვეყანაში აღარ ვართ და რეპრესიული მანქანის ამუშავება, მხოლოდ დროის საკითხია. ჩემი აზრით, უნდა შეიცვალოს ლოზუნგი და უნდა გახდეს არა “რუსულ კანონს”, არამედ „არა რუსულ რეჟიმს“, რადგან ჩვენ გვყავს რუსული მარიონეტული რეჟიმი და არა ხელისუფლება.
ბრძოლას ვხედავთ სამოქალაქო დაუმორჩილებლობაში, გაფიცვებში, რაც საერთაშორისო სამართლით ნებადართულია.
უფრო მეტი ბრძოლა და მკაფიო ნაბიჯების გადადგმა გვჭირდება, რადგან ეს არის გენერალური ბრძოლა საქართველოს თავისუფლების გადარჩენისთვის”,- განაცხადა ორგანიზატორმა.
როგორც ცეცხლაძემ განაცხადა, მშვიდობის ხიდზე გაშლიან სპეციალურ ბანერს, სადაც “მესიჯ ბოქსი” იქნება ორ ენაზე: ქართულად და ინგლისურად.
