ეს პროტესტი არის განსაკუთრებული და მნიშვნელოვანი. ეს ადამიანები, ახალგაზრდები უზარმაზარ საქმეს აკეთებენ მომავლისთვის,- ამის შესახებ განაცხადა „ევროპული საქართველოს“ წევრმა, გიგი წერეთელმა საქველმოქმედო აქცია-კონცერტზე, რომლის მიზანი “უცხოური გავლენის გამჭვირვალობის” შესახებ კანონის საწინააღმდეგო აქციებზე დაკავებული პირების ფინანსური დახმარებაა.
მისივე თქმით, პროტესტის მხარდაჭერის ეს ფორმა ეფექტურია და კარგი.
“ვფიქრობ, ეს პროტესტი არის განსაკუთრებული და მნიშვნელოვანი. ეს ადამიანები, ახალგაზრდები უზარმაზარ საქმეს აკეთებენ მომავლისთვის, განცხადებების გარდა დავეხმაროთ როგორც შეგვიძლია.
პროტესტის მხარდაჭერის ეს ფორმა ეფექტურია და კარგი. არავის ეგონოს, რომ ეს კონცერტი აკნინებს პროტესტის ენერგიას, პირიქით, ეს მითითებაა, რომ პროტესტი დემოკრატიულია და მშვიდობიანი”,- აღნიშნა წერეთელმა.
მისივე თქმით, “უცხოური გავლენის გამჭვირვალობის” შესახებ კანონი იმიტომ მიიღო მმართველმა გუნდმა, რათა დაანახონ ამომრჩეველს, რომ ძალა აქვთ და არავის ეპუებიან.
“კანონი მიიღეს მხოლოდ იმიტომ, რომ დაანახონ ამომრჩეველს მათ ძალა აქვთ და არავის ეპუებიან. ადრე თუ იყო ომის გზავნილი, ახლა სუვერენიტეტი თუ გინდათ, ეს კანონი უნდა მივიღოთ, ასეთ ნონსენსამდე მოვიდნენ”, - აღნიშნა წერეთელმა.
