მაჰმუდ აბასი ისრაელის მიერ ღაზაში, მძევლების გათავისუფლების მიზნით ჩატარებულ ოპერაციასთან დაკავშირებით, გაეროს უშიშროების საბჭოს სხდომას ითხოვს

პალესტინის ლიდერი, მაჰმუდ აბასი ისრაელის მიერ ოთხი მძევლის გადასარჩენად ჩატარებულ ოპერაციასთან დაკავშირებით გაეროს უშიშროების საბჭოს საგანგებო სხდომის ჩატარებას ითხოვს.

„ნუსეირათის ბანაკზე ისრაელის თავდასხმას ასობით მოწამის სიცოცხლე ემსხვერპლა და მრავალი სხვა დაშავდა. პრეზიდენტი აბასი ჩართულია ინტენსიურ კომუნიკაციაში შესაბამის არაბულ და საერთაშორისო მხარეებთან, რათა მოიწვიოს გაერო-ს უშიშროების საბჭოს საგანგებო სხდომა“, - აღნიშნულია პალესტინის საგარეო საქმეთა სამინისტროს განცხადებაში.

შეგახსენებთ, გუშინ ისრაელმა ლტოლვილთა ბანაკიდან ოთხი მძევლის გათავისუფლების მიზნით ჩატარებული ოპერაციის დროს, ღაზის სექტორის ცენტრალური ნაწილი დაბომბა. ღაზას საავადმყოფოს ოფიციალური პირების თქმით, ისრაელის იერიშს 230-ზე მეტი ადამიანი ემსხვერპლა.