პრეზიდენტის მიერ გამოყენებული ვეტო დიახ, აბსოლუტურად სწორია , - ამის შესახებ პარტია “გახარია საქართველოსთვის” წევრმა, მიხეილ დაუშვილმა ჟურნალისტებთან საუბრისას განაცხადა, რითაც გამოეხმაურა „საარჩევნო კოდექსში“ ცვლილებებზე პრეზიდენტის ვეტოს.

მისი თქმით, “ქართულმა ოცნებამ” ეს ცვლილებები იმიტომ მიიღო, რომ ხვდება, არჩევნებში დამარცხდება.

“არსებული წესის, რაც დღესაც მოქმედებს, შინაარსი იყო, რომ ცესკოში გადაწყვეტილების მიღების პროცესში მაღალი კონსენსუსი უნდა შედგეს. “ოცნება” ამ კონსენსუსის საჭიროებას უბრალოდ აუქმებს და მარტივად, თვითონვე შეძლებს, რომ გადაწყვეტილებები მიიღოს. ეს სჭირდება იმიტომ, რომ ცესკო მისთვის კიდევ უფრო მარტივად კონტროლირებადი და მართვადი იყოს. იმიტომ, რომ ხვდება, არჩევნებში მარცხდებიან. ამიტომაც მიიღეს ეს ცვლილებები. შესაბამისად, [საქართველოს პრეზიდენტის მიერ] გამოყენებული ვეტო დიახ აბსოლუტურად სწორია”, - აღნიშნა მიხეილ დაუშვილმა.

ცნობისთვის, საქართველოს პრეზიდენტმა ვეტო დაადო „საარჩევნო კოდექსში“ განხორციელებულ ცვლილებებს, რომლითაც ცესკოს გადაწყვეტილებების მისაღებად საჭირო 2/3-იანი კვორუმი მცირდება სრული შემადგენლობის უმრავლესობამდე.