თბილისის საკრებულოში სხდომა მიმდინარეობს, რომელსაც ოპოზიციის ნაწილი ბოიკოტის რეჟიმში ყოფნის გამო კვლავ არ ესწრება.

თბილისის საკრებულოს დღევანდელ სხდომაზე დღის წესრიგით გათვალისწინებულ საკითხებს შორის არის თამარაშვილის ქუჩაზე განაშენიანების რეგულირების გეგმის პროექტის განხილვა.

როგორ დღეს გამართულ ბრიფინგზე საკრებულოს ურბანული დაგეგმარებისა და საქალაქო მეურნეობის კომისიის თავმჯდომარემ, რევაზ სოხაძემ განაცხადა, აღნიშნული პროექტი საინტერესო და ქალაქისთვის მნიშვნელოვანია. მისივე განცხადებით, იპოდრომზე, დაახლოებით 40 ჰექტარ ტერიტორიაზე, ცენტრალური პარკი გაშენდება, რომლის სამუშაოებიც უკვე მიმდინარეობს. პროექტს აპროტესტებს ოპოზიცია, "ლელოს" ინფორმაციით, იპოდრომის ტერიტორიაზე 77-სართულიანი ცათამბჯენისა და 6 მოზრდილი შენობის აშენება იგეგმება, რაც საბა ბუაძის შეფასებით, "კალაძის ურბანული გენოციდის გაგრძელებაა".

თბილისის საკრებულოში დღეს უკვე მეორე სხდომაა, რომელიც ოპოზიციის გარეშე იმართება. ბოიკოტის რეჟიმში ამ დროისთვის, იმყოფება პარტიები - “ლელო”, “ნაციონალური მოძრაობა” და “გირჩი მეტი თავისუფლება”. აღნიშნული პარტიების გარდა, სხდომას არ ესწრებიან “ანა დოლიძე - ხალხისთვის“ და „საქართველოსთვის“ დეპუტატები.