„ლელო“ იწყებს კამპანიას - „მეგზური ევროპაში“, რომელიც საზოგადოებასთან პარტიის ლიდერთა პირდაპირ კომუნიკაციასა და ამ გზით „ლელოს“ პროგრამულ პრიორიტეტებსა და ხედვებზე ხალხის ინფორმირებას გულისხმობს,- ამის შესახებ ინფორმაციას „ლელო“ ავრცელებს.

პარტიის ცნობით, „ლელოს“ პირველი სივრცე დღეს თბილისი ცენტრალში გაიხსნა.

„ვიყენებთ შესაძლებლობას იმისთვის, რომ ხალხს გავაცნოთ ჩვენი საპროგრამო ხედვები, მათ შორის, როგორ წარმოგვიდგენია ამ ქვეყნის განვითარება და მომავალი. დღეს აქ შევიკრიბეთ პარტიის ლიდერები იმისათვის, რომ ეს კონკრეტული გზავნილები მივიტანოთ იმ ხალხთან, რომელიც ამ სივრცეში ძალიან დიდი რაოდენობით გადაადგილდება“,- აცხადებს „ლელოს“ თბილისის ორგანიზაციის ხელმძღვანელი საბა ბუაძე.

„ლელოს“ საპარლამენტო მდივნის ლანა გალდავას განცხადებით კი, „მეგზური ევროპაში“, გულისხმობს იმას, რომ „ლელოს“ ფასეულობებსა და პროგრამულ სულისკვეთებას მოსახლეობას გააცნობენ.

„დღეს თბილისი ცენტრალის შენობაში გავხსენით ახალი სივრცე და დავიწყეთ ახალი კამპანია „მეგზური ევროპაში“, რაც იმას გულისხმობს, რომ ჩვენს ფასეულობებს, პროგრამულ სულისკვეთებას და ხედვებს გავაცნობთ მოსახლეობას. მათ აქვთ სურვილი, პირისპირ გაესაუბრონ პოლიტიკური პარტიის ლიდერებს, ამიტომაც, ვხვდებით მათ“, - აცხადებს ლანა გალდავა.