რუსეთში, როსტოვის ოლქის წინასწარი დაკავების იზოლატორში მძევლად აყვანილი თანამშრომლები გაათავისუფლეს, - ამის შესახებ ინფორმაციას რუსეთის სახელმწიფო საინფორმაციო სააგენტო TASS-ი ფედერალური სასჯელაღსრულების სამსახურის პრესსამსახურზე დაყრდნობით ავრცელებს.

„როსტოვის ოლქში, რუსეთის ფედერალური სასჯელაღსრულების სამსახურის მთავარი სამმართველოს №1 წინასწარი დაკავების იზოლატორში მძევლების გათავისუფლების სპეცოპერაციისას დამნაშავეების ლიკვიდაცია განხორციელდა, მძევლად აყვანილი თანამშრომლები გაათავისუფლეს და ისინი არ დაშავებულან“, - ნათქვამია განცხადებაში.

შეგახსენებთ, რამდენიმე საათის წინ, რუსეთში, როსტოვის ოლქის წინასწარი დაკავების იზოლატორში დანით შეიარაღებულმა პატიმრებმა ორი თანამშრომელი მძევლად აიყვანეს.