თეთრი სახლი ვლადიმერ პუტინის ჩრდილოეთ კორეაში ვიზიტზე - რუსეთს კოალიციის შეკრება სურს

თეთრი სახლის ეროვნული უშიშროების საბჭოს ევროპის მიმართულების ხელმძღვანელის, მაიკლ კარპენტერის განცხადებით, ვლადიმერ პუტინის ჩრდილოეთ კორეაში ვიზიტი მიანიშნებს, რომ რუსეთს სხვა ქვეყნებთან, კერძოდ ჩრდილოეთ კორეასთან, ირანთან, სირიასთან და გარკვეულწილად ჩინეთთან, კოალიციის შეკრება სურს.

„რაც შეეხება პუტინისა და კიმ ჩენ ინის შეხვედრას ფხენიანში, აშკარაა, რომ ჩვენ ვსაუბრობთ პარტნიორობის გაფართოებაზე. რუსეთის უახლოესი პარტნიორები მსოფლიოში გახდნენ ჩრდილოეთ კორეა, ირანი, სირია და, გარკვეულწილად, ჩინეთი, რომელიც მართალია რუსეთს არ აწვდის იარაღს, მაგრამ აგზავნის ორმაგი დანიშნულების მრავალ პროდუქტს მოწინავე იარაღის სისტემების წარმოებისთვის. ეს არის, ფართო გაგებით, კოალიცია, რომელსაც რუსეთი აყალიბებს. მაგრამ შეადარეთ ის 50 ქვეყნის კოალიციას უკრაინის თავდაცვის საკონტაქტო ჯგუფში და შემდეგ დაახლოებით 100 ქვეყნის კოალიციას, რომელმაც მხარი დაუჭირა გაერო-ს წესდების პრინციპებს შვეიცარიაში და აშკარა კონტრასტს დაინახავთ“, - აღნიშნა კარპენტერმა.

შეგახსენებთ, რუსეთისა და ჩრდილოეთ კორეის ლიდერებმა, ვლადიმერ პუტინმა და კიმ ჩენ ინმა ხელი მოაწერეს შეთანხმებას ყოვლისმომცველი სტრატეგიული პარტნიორობის შესახებ, რომელიც ითვალისწინებს ურთიერთდახმარებას ერთ-ერთი ამ სახელმწიფოს წინააღმდეგ აგრესიის შემთხვევაში.