„საქართველოს ბანკის“ მხარდაჭერით, Startup Grind-ის კიდევ ერთი ღონისძიება გაიმართა.

„საქართველოს ბანკის“ ინფორმაციით, ღონისძიებაზე სპიკერების რანგში, ქართული სტარტაპის CityPay.io - ს დამფუძნებლები, ბექა ქემერტელიძე და ერალპ ჰატიპოღლუ იყვნენ. ღონისძიება მიზნად ისახავდა მათი პირადი გამოცდილების გაზიარებას.

ბანკის განმარტებით, ერალპ ჰატიპოღლუმ ისაუბრა თუ რა გზა გაიარეს მათ ამ 3 წლის განმავლობაში, დაარსებიდან - ინვესტიციამდე. ისაუბრეს, თუ რა იყო თავდაპირველი იდეა, როგორ შეძლეს 10 მლნ. დოლარის დაფინანსების მოპოვება და როგორ გავიდნენ საერთაშორისო ბაზარზე, ასევე თუ რა გამოწვევები ჰქონდათ გზადაგზა და როგორ გაუმკლავდნენ მათ.

„მოხარული ვარ, რომ მონაწილეობას Startup Grind - ის შეხვედრაში ვიღებდი, სპიკერის რანგში და შევხვდი ტექნოლოგიებისა და ბიზნესის სფეროთი დაინტერესებულ არაერთ საინტერესო ადამიანს. მიმაჩნია, რომ მსგავსი პლატფორმის არსებობა ძალიან მნიშვნელოვანი და ბენეფიტურია დამწყები სტარტაპერებისთვის, რადგან ასეთი ღონისძიებებით, მეწარმეებს შესაძლებლობა აქვთ ისწავლონ ერთმანეთის გამოცდილებებზე, მათ წარმატებებსა თუ წარუმატებლობებზე, რაც საბოლოო ჯამში ხელს უწყობს ქართული სტარტაპ ეკოსისტემის გაზრდას, განვითარებასა და ამ სექტორში ინოვაციების დანერგვას. დამწყებ სტარტაპერებს ვურჩევდი, რომ აირჩიეთ ის ბიზნეს იდეა, რომლითაც ყველაზე მეტად ხართ გატაცებული, შექმენით ძლიერი გუნდი და იყავით ადაპტირებადი, რადგან სტარტაპ გარემო მუდმივად ცვალებადია. ასევე, იზეიმეთ მცირე გამარჯვებები, რათა იყოთ მოტივირებული მთელი თქვენი სამეწარმეო „მარათონის“ განმავლობაში. გარდა ამისა, ვურჩევდი რომ იპოვონ, გაიცნონ და დაუახლოვდნენ ადგილობრივ სტარტაპერებს, დაუკავშირდნენ უკვე გამოცდილ მეწარმეებს, მენტორებს, ინვესტორებს და ეცადონ მიიღონ მათი უკუკავშირი და მხარდაჭერა. ეს ყოველივე საჭიროა იმისთვის, რომ უფრო გამოცდილი ადამიანებისგან ვისწავლოთ და შეცდომები თავიდან ავირიდოთ“, - განაცხადა CityPay.io - ს თანადამფუძნებელმა, ერალპ ჰატიპოღლუმ.