ორგანიზაცია „სამოქალაქო იდეის“ ორგანიზებით რიგით მეხუთე საერთაშორისო კონფერენცია - „სტრატეგიული ბუნდოვანება დიდი სახელმწიფოების საჭადრაკო დაფაზე“ მიმდინარეობს.
როგორც „სამოქალაქო იდეის“ თავმჯდომარემ თინა ხიდაშელმა განაცხადა, კონფერენციაზე საუბრობენ იმ მოვლენებზე, რომლებიც განსაკუთრებით აქტუალურია საქართველოში.
„ბოლო გადაწყვეტილებები, ერთის მხრივ „უცხოური გავლენის გამჭვირვალობის" შესახებ კანონი, მეორეს მხრივ ანაკლიის პორტში ჩინური კომპანიის გამარჯვებულად გამოცხადების შესახებ, იქნება კონფერენციის შემადგენელი მნიშვნელოვანი ნაწილი.
ექსპერტები 25 ქვეყნიდან გვყავს. რა თქმა უნდა, ქვეყანაში არსებული გამოწვევები მრავალმხრივია, ეკონომიკური და სავაჭრო, უკრაინის ომით გამოწვეული. ამიტომ კონფერენციაზე არ ვსაუბრობთ მარტო რუსეთზე, არამედ ჩინეთის სახალხო რესპუბლიკის ფაქტორზეც. დღევანდელ სამყაროში, სამწუხაროდ, რუსეთი აღარ არის ერთადერთი გამოწვევა, რომლის გავლენების შეჩერებაზეც მუშაობენ ევროკავშირსა და ნატოში“, - განაცხადა თინა ხიდაშელმა.
ორგანიზატორების ინფორმაციით, კონფერენცია 2 დღის განმავლობაში გაგრძელდება, რომელსაც 60-მდე ადგილობრივი და საერთაშორისო ექსპერტი, პოლიტიკოსი, მედიისა და არასამთავრობო ორგანიზაციების წარმომადგენლები დაესწრებიან.
