უკრაინელი მეღვინეები ღვინისა და კონიაკის მწარმოებელი ქართული და სომხური კომპანიების წინააღმდეგ სანქციების დაწესებას ითხოვენ, - ამის შესახებ ინფორმაციას უკრაინული გამოცემა, „ეკონომიჩესკაია პრავდა“ ავრცელებს.

უკრაინული გამოცემის ცნობით, კორპორაცია Ukrvinprom-ში გაერთიანებული მეღვინეები, კიევს მოუწოდებენ, რომ საქართველოდან და სომხეთიდან ღვინისა და კონიაკის იმ მწარმოებლებს სანქციები დაუწესდეს, რომელთა პროდუქციაც, მათივე თქმით, რუსეთსა და რუსეთის მიერ ანექსირებულ უკრაინის ტერიტორიაზე ჯერ კიდევ იყიდება.

სანქციების დაწესების წინადადებით Ukrvinprom-მა უკრაინის ეროვნული უსაფრთხოებისა და თავდაცვის საბჭოს მიმართა.

Ukrvinprom-ის გენერალურმა დირექტორმა, ვლადიმერ კუჩერენკომ განაცხადა, რომ სანქციების დაწესების შემთხვევაში საბაჟო პროდუქციას უკრაინაში არ შეუშვებს და აღნიშნა, რომ ქართული და სომხური ღვინისა და კონიაკის სრულ აკრძალვაზე საუბარი არ არის.