„ერთიანი ნაციონალური მოძრაობის“ ოფისში, პოლიტსაბჭოს სხდომა მიმდინარეობს. როგორც „ერთიანი ნაციონალური მოძრაობის“ გენერალურმა მდივანმა პეტრე ცისკარიშვილმა განაცხადა, პოლიტსაბჭოს ჩატარება რამდენიმე კვირაში ან თვეში ერთხელ აუცილებელი და მნიშვნელოვანია პარტიული ცხოვრებისთვის.

„პოლიტსაბჭოს თავმჯდომარის კანდიდატურაზე რამდენიმე კვირის წინ მოგახსენეთ, რომ ლევან ხაბეიშვილის კანდიდატურა იქნება წარდგენილი. იმედი გვაქვს, რომ მას ექნება შესაბამისი მხარდაჭერა პოლიტსაბჭოს წევრების მხრიდან. ამას გარდა, პოლიტსაბჭო იღებს გადაწყვეტილებას თუ რა ფორმით, რა ფორმატით უნდა იქნას ყრილობა მოწვეული, რამდენი დელეგატი იყოს და ა.შ.

სხვა საორგანიზაციო საკითხებიც იქნება. პოლიტსაბჭოს ჩატარება რამდენიმე კვირაში ან თვეში ერთხელ აუცილებელი და მნიშვნელოვანია პარტიული ცხოვრებისთვის, ამ შემთხვევაშიც გვინდა არა მხოლოდ საორგანიზაციო საკითხების გავლა, იგივე ყრილობასთან და თავმჯდომარის დამტკიცებასთან დაკავშირებით, არამედ კონსულტაციის გავლა ჩვენს წევრებთან. პოლიტსაბჭო ერთგვარი სათათბირო ინსტიტუციაა, ის ორგანოა ვისი აზრიც ჩვენთვის მნიშვნელოვანია, ეს ის ხალხია, ვინც ველზე მუშაობს, ვისაც ყოველდღიური შეხება აქვს ამომრჩეველთან, ამიტომ ჩვენ მაქსიმალურად ვცდილობთ გვქონდეთ აზრთა გაცვლა-გამოცვლა“,- განაცხადა პეტრე ცისკარიშვილმა.