რუსეთის პრეზიდენტის პრესსპიკერი, დიმიტრი პესკოვი საზოგადოებას მოუწოდებს, იმასთან დაკავშირებით, თუ რა მოხდა კიევის ბავშვთა საავადმყოფოში, რუსეთის თავდაცვის სამინისტროს განცხადებით იხელმძღვანელონ, რომელიც უკრაინის მშვიდობიან ობიექტებზე თავდასხმას გამორიცხავს.

„მოგიწოდებთ, იხელმძღვანელოთ რუსეთის ფედერაციის თავდაცვის სამინისტროს განცხადებით, რომელშიც ნათქვამია, რომ საუბარია რაკეტსაწინააღმდეგო სისტემის დაცემაზე. დაჟინებით ვაცხადებთ: სამოქალაქო ობიექტებზე დარტყმებს არ ვახორციელებთ“, - განაცხადა პესკოვმა ჟურნალისტებთან საუბარში, როდესაც მან კიევში, ბავშვთა საავადმყოფოზე თავდასხმის შესახებ დასმულ შეკითხვას უპასუხა.

მისი თქმით, დარტყმები ხორციელდება მხოლოდ კრიტიკულ ინფრასტრუქტურაზე, სამხედრო ობიექტებზე, რომლებიც, ამა თუ იმ გზით, კიევის რეჟიმის სამხედრო პოტენციალს უკავშირდება.

ცნობისთვის, რუსეთის თავდაცვის სამინისტრომ გუშინ განაცხადა, უკრაინაში სამოქალაქო ობიექტებზე მიზანმიმართული დარტყმის შესახებ განცხადებები რეალობას არ შეესაბამება. უწყების მტკიცებით, განადგურება მოხდა უკრაინის შეიარაღებული ძალების საჰაერო თავდაცვის რაკეტის დაცემის გამო.

შეგახსენებთ, გუშინ რუსულმა ძალებმა უკრაინის ტერიტორიაზე, მათ შორის კიევზე, სარაკეტო თავდასხმა განახორციელა, რასაც 40-ზე მეტი ადამიანის სიცოცხლე ემსხვერპლა, დაშავებულთა რაოდენობა კი 200-ს აჭარბებს. დაზიანებულ სამოქალაქო ინფრასტრუქტურას შორის კიევის ბავშვთა საავადმყოფოც არის, სადაც 2 ადამიანი დაიღუპა და 32 დაშავდა.