პარლამენტში „ამნისტიის შესახებ“ კანონის პროექტი ინიცირებულია. ამნისტიის პროექტი ფრაქცია „ქართულმა ოცნებამ“ წარადგინა.

ინიციატორთა განმარტებით, ამნისტია 2024 წლის 1-ელ ივლისამდე ჩადენილ სისხლის სამართლის დანაშაულებს შეეხება და „სისხლის სამართლის კოდექსის“ 66 მუხლს მოიცავს. ასევე, 1/6-ით შემცირება 225 მუხლს შეეხება.

როგორც პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, რატი იონათამიშვილმა აღნიშნა, ამნისტია 2024 წლის 1-ელ ივლისამდე ჩადენილ მთელ რიგ დანაშაულებს შეეხება.

„ამნისტია შეეხება 2024 წლის 1-ელ ივლისამდე ჩადენილ მთელ რიგ დანაშაულებს. კერძოდ, სსკ-ის 66 მუხლით გათვალისწინებულ დანაშაულს. ამასთანავე ჩამოთვლილი 66 მუხლის გარდა, 1/6 - ით შემცირება დამატებით 225 მუხლს შეეხება”, - განაცხადა რატი იონათამიშვილმა.

იონათამიშვილის განმარტებით, ამნისტია არ შეეხებათ მკვლელობისთვის ნასამართლებ პირებს, ნარკორეალიზატორებს, სქესობრივ დანაშაულებს, ყაჩაღობას, ტერორიზმს, კორუფციულ და სამოხელეო დანაშაულებს, ქურდულ სამყაროს, კონვენციურ დანაშაულებს, ტრეფიკინგს და სხვა მძიმე და განსაკუთრებით მძიმე კატეგორიის დანაშაულებს.

“ცალკე უნდა აღინიშნოს, რომ ამნისტია განსაკუთრებულ მიდგომას ნერგავს პრობაციონერების მიმართ და პირობითი მსჯავრის ერთი წლით შემცირება დაახლოებით, 7 000 პირს შეეხება, რაც ამნისტიის წინა პროგრამებთან შედარებით სიახლეს წარმოადგენს.

რაც შეეხება კანონის მიღების ვადებს, მისი პირველი მოსმენით მიღება რიგგარეშე სესიაზე იგეგმება”, - აღნიშნა იონათამიშვილმა.

იხილეთ კანონპროექტი