ნიკოლოზ სამხარაძე და მარიამ ლაშხი ნიდერლანდების სამეფოს პარლამენტის წარმომადგენელთა პალატის საგარეო საქმეთა კომიტეტის დელეგაციას შეხვდნენ
საგარეო ურთიერთობათა კომიტეტის თავმჯდომარე ნიკოლოზ სამხარაძე და კომიტეტის თავმჯდომარის პირველი მოადგილე მარიამ ლაშხი ნიდერლანდების სამეფოს პარლამენტის წარმომადგენელთა პალატის საგარეო საქმეთა კომიტეტის დელეგაციას შეხვდნენ. ინფორმაციას პარლამენტის პრესსამსახური ავრცელებს.
მათივე ცნობით, მხარეებმა ორ ქვეყანას შორის არსებული ურთიერთობები მათ შორის, საპარლამენტო თანამშრომლობის განვითარების შესაძლებლობები მიმოიხილეს.
„ქართველმა კანონმდებლებმა საქართველოს საგარეო პოლიტიკურ პრიორიტეტებზე, ევროპულ და ევროატლანტიკურ სტრუქტურებში ქვეყნის ინტეგრაციაზე და ამ კუთხით, საქართველოს მიერ გადადგმულ ნაბიჯებზე ისაუბრეს.
მხარეებმა ასევე ისაუბრეს გეოპოლიტიკურ ვითარებასა და უსაფრთხოების გამოწვევებზე. ყურადღება გამახვილდა ოკუპირებულ აფხაზეთსა და ცხინვალის რეგიონში არსებულ რთულ ვითარებასა და ოკუპაციიდან გამომდინარე პოლიტიკურ, უსაფრთხოების და ეკონომიკური კუთხით არსებულ გამოწვევებზე.
შეხვედრისას საუბარი შეეხო კავკასიის რეგიონში არსებულ უსაფრთხოების საკითხებს და სომხეთ-აზერბაიჯანს შორის კონფლიქტის მშვიდობიანად მოგვარების პროცესში საქართველოს მნიშვნელოვან როლს.
საუბრის თემას ასევე წარმოადგენდა ქვეყნის შიდაპოლიტიკური ვითარება, ოქტომბერში დაგეგმილი საპარლამენტო არჩევნები და არსებული წინასაარჩევნო გარემო“,-აღნიშნულია ინფორმაციაში.
