12 წელია, თბილისს არც ერთი მეტროსადგური არ შემატებია, „ვარკეთილის“, „გურამიშვილის“, „ავლაბრის“, „გოცირიძის“ მეტროსადგურების რეაბილიტაცია დღემდე დაუსრულებელია - მივმართავ თბილისის მერს, როგორ აპირებს ჩვენი პარტნიორი ორგანიზაციების მიერ გამოყოფილი თანხების ათვისებას? - ამის შესახებ „ერთიანობის“ ლიდერმა, ვასო ურუშაძემ მეტროსადგურ „ავლაბართან“ გამართულ ბრიფინგზე განაცხადა.

მისივე თქმით, საქართველოს განვითარება წარმოუდგენელია იმ პირობებში, როდესაც ხელისუფლება მთავარი სტრატეგიულ პარტნიორებს ესხმის თავს.

„მინდა, მივმართო თბილისის მერს, კახა კალაძეს, რომელიც გამოირჩევა ანტიდასავლური განცხადებებით, რომელიც თავს ესხმის ჩვენს სტრატეგიულ პარტნიორებს. მე მინდა მას ვკითხო, როგორ აპირებს ის თბილისის მეტროს რეაბილიტაციას? როგორ აპირებს ის აითვისოს ჩვენი პარტნიორი ორგანიზაციების, ამ შემთხვევაში „იბიარდის“ მიერ გამოყოფილი თანხები, რომლის 200 მილიონი უნდა მოხმარდეს თბილისში 12 მეტროს სადგურის რეაბილიტაციას, 36 ესკალატორის განახლებას? როგორ უნდა აითვისოს მან 600 მილიონი, რომელიც გამოყოფილია მეტროპოლიტენის ვაგონების განახლებისთვის?

თბილისის, საქართველოს განვითარება წარმოუდგენელია იმ პირობებში, როდესაც ხელისუფლება თავს ესხმის მთავარი სტრატეგიულ პარტნიორებს. ეს არჩევნებში არ არის მხოლოდ საპარლამენტო არჩევნები, ეს არის სახელმწიფოებრივი მნიშვნელობის არჩევნები, რომელიც გადაარჩენს საქართველოს. ჩვენ 26 ოქტომბერს გავიმარჯვებთ ერთობით, ერთიანობით და ის რაც „ოცნებამ“ გააფუჭა ერთიანობით აუცილებლად ავაშენებთ”, - განაცხადა ურუშაძემ.