მიუხედავად იმისა, რომ „ქართულ ოცნებასთან“ ჩვენი პარტნიორები, მათ შორის ნატო-დან, პრაქტიკულად ყოველგვარ ურთიერთობას წყვეტენ, ისინი ძალიან მჭიდრო კავშირს ქართველ ხალხთან ინარჩუნებენ და ყოველი ასეთი განცხადებით ისინი მკაფიოდ გვეუბნებიან - ქართველ ხალხს, რომ საქართველოსთვის, ქართველი ხალხისთვის ნატო-ს და ევროკავშირის კარი ღიაა, - ამის შესახებ „ერთიანი ნაციონალური მოძრაობის“ საგარეო მდივანმა, ზურაბ ჭიაბერაშვილმა ნატო-ს გენერალური მდივნის სპეციალური წარმომადგენლის სამხრეთ კავკასიასა და ცენტრალურ აზიაში, ხავიერ კოლომინას განცხადებასთან დაკავშირებით განაცხადა.

მისივე თქმით, 26 ოქტომბერს საქართველო ევროპული განვითარების ტრაექტორიაზე უნდა დაბრუნდეს.

„კოლომინას განცხადება კიდევ ერთხელ ნათლად მიუთითებს, რომ მიუხედავად იმისა, რომ „ქართულ ოცნებასთან“ ჩვენი პარტნიორები, მათ შორის ნატო-დან, პრაქტიკულად ყოველგვარ ურთიერთობას წყვეტენ, ისინი ძალიან მჭიდრო კავშირს ქართველ ხალხთან ინარჩუნებენ და ყოველი ასეთი განცხადებით ისინი მკაფიოდ გვეუბნებიან - ქართველ ხალხს, რომ საქართველოსთვის, ქართველი ხალხისთვის ნატო-ს და ევროკავშირის კარი ღიაა, მხოლოდ ამას სჭირდება ხელისუფლება, რომელიც საქართველოს ხალხის, საქართველოს ეროვნულ ინტერესებს გაატარებს. ბუნებრივია, 26 ოქტომბერს ჩვენ უნდა გავიმარჯვოთ „ქართულ ოცნებაზე“, ჩვენ საქართველო ევროპული განვითარების ტრაექტორიაზე უნდა დავაბრუნოთ იმისათვის, რომ არა თუ შევინარჩუნოთ ურთიერთობის ხაზი, რაც დღემდე გვქონდა, არამედ საქართველო ევროკავშირის სრულფასოვანი წევრი გახდეს და იმ დიდი ტრანსატლანტიკური ერთობის, რაც არის სიმდიდრე, კეთილდღეობა, დაცულობა და უსაფრთხოება“, - განაცხადა ზურაბ ჭიაბერაშვილმა.

ცნობისთვის, ნატო-ს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში, ხავიერ კოლომინა სოციალურ ქსელში წერს, რომ „ნატო საქართველოს მთავრობას მოუწოდებს, დემოკრატიული ინსტიტუტების გაძლიერებისა და ევროატლანტიკური ინტეგრაციისკენ, ქართველი ხალხის მისწრაფებების ხელშეწყობის მიზნით, რეფორმები დააჩქაროს“.