პარიზის 2024 წლის ზაფხულის 33-ე ოლიმპიური თამაშებზე, რომელიც 26 ივლისს იხსნება, საქართველოდან 28 სპორტსმენი მონაწილეობს.

ეროვნულ ოლიმპიურ ნაკრებთან პარიზის ოლიმპიურ თამაშებზე იმუშავებს საქართველოს სამედიცინო გუნდი. მათ შორის არიან თბილისის სახელმწიფო სამედიცინო უნივერსიტეტის ფიზიკური მედიცინისა და რეაბილიტაციის ფაკულტეტის კურსდამთავრებულები: ფირუზ ტუნაძე (სამედიცინო გუნდის ხელმძღვანელი), ლაშა ღონღაძე, გიორგი მგელაძე, თემურ მგელაძე, ავთანდილ თელია და გიორგი ჭინჭარაული.

აღსანიშნავია, რომ 24 წლის შემდეგ პირველად, საქართველოს ოლიმპიური ნაკრების სამედიცინო სამსახურს ზაფხულის ოლიმპიურ თამაშებზე ახალი ხელმძღვანელი ეყოლება: თბილისის სახელმწიფო სამედიცინო უნივერსიტეტის კურსდამთავრებულის, თსსუ-ის პროფესორ ზურაბ კახაბრიშვილის გადაწყვეტილებით, საპასუხისმგებლო საქმე თსსუ-ის კურსდამთავრებულმა, ფირუზ ტუნაძემ ჩაიბარა.

თავად პროფესორი ზურაბ კახაბრიშვილი კი ძალოსნობის საერთაშორისო ფედერაციამ, პარიზის თამაშებზე ტექნიკურ ოფიციალურ პირად (მთავარი ექიმი) დანიშნა.

მოხარულები ვართ, რომ თბილისის სახელმწიფო სამედიცინო უნივერსიტეტის ფიზიკური მედიცინისა და რეაბილიტაციის ფაკულტეტის კურსდამთავრებულები ჯანმრთელობის სადარაჯოზე გლობალური სტანდარტების შესაბამისად აგრძელებენ კარიერულ წინსვლას.

თბილისის სახელმწიფო სამედიცინო უნივერსიტეტი წარმატებებს უსურვებს სპორტსმენებს და ოლიმპიური გუნდის თითოეულ წევრს.