„შიდა საქმეებში ჩარევის“ გამო, ვენესუელა ლათინური ამერიკის შვიდი ქვეყნის დიპლომატების მისი ტერიტორიიდან დაუყოვნებლივ გაყვანას ითხოვს, - ამის შესახებ განცხადებას ვენესუელის საგარეო საქმეთა მინისტრი, ივან ჟილი ავრცელებს.

ვენესუელის საგარეო საქმეთა მინისტრის მიერ გავრცელებულ განცხადებაში ნათქვამია, რომ ვენესუელა არგენტინიდან, დომინიკის რესპუბლიკიდან, კოსტა-რიკიდან, პანამიდან, პერუდან, ურუგვაიდან და ჩილედან დიპლომატებს უკან იწვევს და ამ ქვეყნების დიპლომატების მისი ტერიტორიიდან დაუყოვნებლივ გაყვანას მოითხოვს.

ვენესუელის საგარეო უწყების განცხადებით, ქვეყანაში ჩატარებულ საპრეზიდენტო არჩევნებთან დაკავშირებით აღნიშნული სახელმწიფოების განცხადებები ვენესუელის „შიდა საქმეებში ჩარევას“ წარმოადგენს.

შეგახსენებთ, ვენესუელის საარჩევნო კომისიის მიერ გამოცხადებული შედეგების მიხედვით, ქვეყნის საპრეზიდენტო არჩევნებში ნიკოლას მადურომ გაიმარჯვა. მან არჩევნებში ხმების 51% მიიღო, ხოლო მისმა მოწინააღმდეგემ, ედმუნდო გონსალესმა 44%. ოპოზიციის ლიდერმა, მარია კორინა მაჩადომ განაცხადა, რომ არჩევნებში მათმა წარმომადგენელმა გაიმარჯვა და გონსალესმა ამომრჩეველთა ხმების 70% მოიპოვა. ვენესუელის დედაქალაქსა და სხვა დიდ ქალაქებში უსაფრთხოების ძალები და აქციის მონაწილეები, რომლებიც არჩევნებს გაყალბებულად აცხადებენ, ერთმანეთს დაუპირისპირდნენ.