მაია სანდუ რუსეთის ჯაშუშობის ბრალდებით დაკავებულებზე - სახელმწიფო ღალატის შემთხვევები მკაცრად უნდა დაისაჯოს - როცა ვამბობ „დასჯას“, პროკურატურასა და სასამართლოებს ვგულისხმობ
მაია სანდუს განცხადებით, სახელმწიფო ღალატის შემთხვევები კანონის შესაბამისად მკაცრად უნდა დაისაჯოს.
მოლდოვის პრეზიდენტი პარლამენტში ჩატარებული ჩხრეკის შემდეგ იურიდიული დეპარტამენტის ხელმძღვანელისა და სასაზღვრო პოლიციის თანამშრომლის დაკავებას გამოეხმაურა.
„ასეთი შემთხვევების მხოლოდ გამოვლენა არ არის საკმარისი, მათი დასჯა უნდა მოხდეს. როცა ვამბობ „დასჯას“, პროკურატურასა და სასამართლოებს ვგულისხმობ. იმედი მაქვს, ამჯერად მტკიცებულებები სერიოზული იქნება და იმ ინსტიტუტების დამოკიდებულებაც სერიოზული იქნება, რომლებიც ამ ადამიანებს დასჯიან. ახლა მთავარია მივაღწიოთ იმას, რომ სამშობლოს ღალატის ეს მაგალითი, კანონის შესაბამისად, მკაცრად დაისაჯოს“, - განაცხადა მაია სანდუმ.
შეგახსენებთ, გუშინ, პარლამენტში ჩატარებული ჩხრეკის შემდეგ, მოლდოვაში სახელმწიფო ღალატის ბრალდებით ორი მაღალჩინოსანი დააკავეს. „რადიო თავისუფლების“ რუმინული სამსახურის თანახმად, ერთ-ერთი დაკავებული მოლდოვის პარლამენტის იურიდიული დეპარტამენტის ხელმძღვანელი, იონ კრიანგეა. მათი ინფორმაციით, ის კიშინიოვში რუსეთის საელჩოს თანამშრომლებისთვის ინფორმაციის გადაცემის დროს დააკავეს. დღეს, მოლდოვამ რუსეთის საელჩოს თანამშრომელი ქვეყნიდან გააძევა.
