დიდი გაცვლის ფარგლებში რუსეთმა ამერიკელი ჟურნალისტი ევან გერშკოვიჩი და ყოფილი სამხედრო პოლ უილანი გაათავისუფლა. ამის შესახებ ინფორმაციას გამოცემა Bloomberg-ი წყაროებზე დაყრდნობით ავრცელებს.

გამოცემის წყაროების ცნობით, Wall Street Journal-ის რეპორტიორი ევან გერშკოვიჩი და ამერიკელი ყოფილი საზღვაო ქვეითი პოლ უილანი ახლა გზაში არიან რუსეთის საზღვრებს მიღმა დანიშნულების ადგილისკენ.

მედია აღნიშნავს, რომ შეთანხმების ფარგლებში აშშ და მისი მოკავშირეები რუსეთს დაუბრუნებენ პატიმრებს, რომლებიც მათ ჰყავთ. გაცვლის სხვა დეტალები ამ მომენტისთვის უცნობია.

ცნობისთვის, ბოლო დღეების განმავლობაში მედია პატიმრების დიდი გაცვლისთვის მზადების თაობაზე წერდა. კერძოდ, ცნობები ვრცელდებოდა, რომ პოტენციალურ გაცვლაში ჩართული იქნებოდნენ შეერთებული შტატები, გერმანია, სლოვენია და დიდი ბრიტანეთი.