საქართველოს ენერგეტიკისა და წყალმომარაგების მარეგულირებელ ეროვნულ კომისიაში, (სემეკ) USAID-ის მხარდაჭერით მიმდინარე კომუნალური სამსახურების მარეგულირებელი კომისიების ეროვნული ასოციაციის (NARUC) გენდერული თანასწორობის პროგრამის - „ენერგეტიკაში ქალი ლიდერების წინ წამოწევის“ ფარგლებში, ქალი სტაჟიორების 6 თვიანი პროგრამის შემაჯამებელი შეხვედრა გაიმართა. ამის შესახებ ინფორმაციას „სემეკი“ ავრცელებს.

მათი ცნობით, შეხვედრას კომისიის აღმასრულებელი დირექტორი ელეონორა ლაგვილავა და დეპარტამენტების ხელმძღვანელი პირები ესწრებოდნენ. შეხვედრის მონაწილეებმა სტაჟირების პროგრამის შედეგები განიხილეს, ქალი სტაჟიორების შეფასებები პროგრამასთან დაკავშირებით. სტაჟიორების მხრიდან ხაზი გაესვა პროგრამის მნიშვნელობასა და ეფექტიანობას ენერგეტიკის სექტორში ქალთა როლის გაძლიერების კუთხით. პროგრამის მონაწილეებს სერტიფიკატები გადაეცათ.

„ენერგეტიკის სექტორში ქალის როლის გაძლიერების მიზნით, „სემეკის“ ელექტროენერგეტიკის, ბუნებრივი გაზისა და იურიდიულ დეპარტამენტებში, ასევე კომისიასთან არსებულ ელიზბარ ერისთავის სახელობის ენერგეტიკის სასწავლო ცენტრში, USAID-ის მხარდაჭერით მიმდინარე NARUC-ის გენდერული თანასწორობის პროგრამის - „ენერგეტიკაში ქალი ლიდერების წინ წამოწევის“ ფარგლებში ანაზღაურებადი სტაჟირების პროგრამა 2-ჯერ განხორციელდა. პროგრამის ფარგლებში სტაჟირება გაიარეს კონკურსის წესით შერჩეულმა ინჟინერიის, იურისტის, ეკონომისტი/ფინანსისტის სპეციალობის მიმართულებით ბაკალავრიატისა და მაგისტრატურის დამამთავრებელი კურსის ქალმა სტუდენტებმა და ახალმა კურსდამთავრებულებმა“,- ნათქვამია გავრცელებულ ინფორმაციაში.