საქართველოს კონკურენციისა და მომხმარებლის დაცვის სააგენტომ, მომხმარებლის სასარგებლოდ, ხუთ მოვაჭრესთან - შპს „ვარაზის ხევი 95", შპს „მარსიანელი", შპს „ლიმონი 2009", შპს „ბბმ 18" და ი/მ დავით რომანაძესთან, „მომხმარებლის უფლებების დაცვის შესახებ" საქართველოს კანონმდებლობის სავარაუდო დარღვევის ფაქტზე, პირობითი ვალდებულებების აღების შესახებ შეთანხმება გააფორმა.

საქართველოს კონკურენციისა და მომხმარებლის დაცვის სააგენტოს ცნობით, შესაბამისად, მოვაჭრეებმა აიღეს ვალდებულება - საცნობარო (კვების) მენიუში ცვლილება შეიტანონ და მომხმარებელს ინფორმაცია საქონლის საბოლოო ფასის შესახებ მიაწოდონ.

„მნიშვნელოვანია აღინიშნოს, რომ GCCA-ის მიერ, 2024 წელს, კვებითი მომსახურების სექტორში, მომხმარებლის ინტერესების დაცვის მიზნით, ჯამური ფასის მითითების სტანდარტი დადგინდა. შესაბამისად, სააგენტოს მიერ მიღებული გადაწყვეტილების მიხედვით, თითოეული მოვაჭრე ვალდებულია - მკაფიო და გასაგები ფორმით, საცნობარო (კვების) მენიუში ცვლილება შეიტანოს და მომხმარებელს ინფორმაცია საქონლის საბოლოო (ჯამური) ფასის შესახებ მიაწოდოს, რომელშიც მითითებული იქნება დღგ და ყველა სხვა გადასახადი/ხარჯი. მათ შორის, მომსახურების საფასური.

ინფორმაციისთვის, 2024 წლის შვიდი თვის მონაცემებით, მომხმარებელთა უფლებების დაცვის მიმართულებით, 502 განაცხადი დაფიქსირდა. 114 საქმეზე დადასტურდა მომხმარებელთა ჯგუფის უფლების 52 დარღვევის ფაქტი. GCCA-ის მიერ დაკისრებული ვალდებულების შეუსრულებლობის გამო 27 მოვაჭრეს - 35 საქმეზე ჯარიმა დაეკისრა, ჯამში - 22 312 ლარი“,- აღნიშნულია ინფორმაციაში.