პოლიტიკური გაერთიანება „კოალიცია ცვლილებისთვის - გვარამია, მელია, გირჩი, დროას“ ტყიბულის ოფისი გაიხსნა. ამის შესახებ ინფორმაციას პარტია „ახალის“ პრესსამსახური ავრცელებს.

როგორც გავრცელებულ ინფორმაციაშია ნათქვამი, ზურაბ გირჩი ჯაფარიძემ და ნიკა მელიამ ადგილობრივებთან შეხვედრაზე საუბრისას ხაზი გაუსვეს ისეთ პრიორიტეტულ საკითხებს, როგორებიცაა საქართველოს ევროკავშირში გაწევრიანება, თვითმმართველობის გაძლიერება, რეგიონების განვითარება, 26 ოქტომბრის არჩევნების მნიშვნელობა და დეცენტრალიზაცია.

„მეოთხე ადგილია, სადაც დღეს ოფისი გავხსენით. მთავარი პრობლემა არის შემდეგი, რომ ყველაფერი არის მთავრობის ხელში, რასაც ახლა ივანიშვილი საკუთარი კეთილდღეობისთვის იყენებს. ეს უნდა შეიცვალოს ფუნდამენტურად. ამ ცვლილების საწყისად კი უნდა იქცეს 26 ოქტომბერი, როდესაც წიაღისეულები, მინერალები, ტყე, მიწა თუ სხვა ყველაფრის მესაკუთრე მოქალაქე გახდება. ეს არის ევროპა, იქ არის თვითმმართველობა განვითარებული. ადგილზე ადამიანებმა იციან რა არის მათი საჭიროებები, ვიდრე რომელიმე ბიუროკრატმა თბილისში. ეს ყველაფერი უნდა იყოს ხალხის, ამის გაკეთების შანსი კი ჩნდება მას შემდეგ, რაც ამ სისტემას დავამარცხებთ და ხელისუფლებას კოალიციური მმართველობა ჩაიბარებს“, - განაცხადა ზურაბ გირჩი ჯაფარიძემ.

დღეს, „კოალიცია ცვლილებისთვის - გვარამია, მელია, გირჩი, დროა“ რაჭა-ლეჩხუმის მასშტაბით საარჩევნო ოფისებს ხსნის.