„ერთიანობა - ნაციონალური მოძრაობა“ საჯარო რეესტრის ეროვნულ სააგენტოს მიმართავს, საქართველოს რეგიონებიდან აჭარის მუნიციპალიტეტებში მოქალაქეთა გადმოწერის თაობაზე წლებისა და თვეების მიხედვით ჩაშლილ სტატისტიკა მიაწოდოს.

პარტიის წევრებმა ბრიფინგი ბათუმის იუსტიციის სახლთან გამართეს. შეკრებილების

განცხადებით, „ქართული ოცნება“ აჭარაში არჩევნებს აგებს, რის გამოც სხვა რეგიონებიდან აჭარის მუნიციპალიტეტებში მათი მხარდამჭერთა გადმოწერა ხდება.

„26 ოქტომბერს აჭარის მოსახლეობა პარლამენტთან ერთად ირჩევს უმაღლეს საბჭოს. „ქართულ ოცნებაში“ კარგად ხვდებიან, რომ „ერთიანობა - ნაციონალური მოძრაობა“ აჭარაში არჩევნებს იგებს, ამიტომ ამ ჩამორჩენის აღმოფხვრის მიზნით საქართველოს სხვადასხვა რაიონიდან გადაწყვიტეს აჭარის მუნიციპალიტეტებში თავიანთი მხარდამჭერების გადმოწერა. ხელისუფლებას არაფერი არ გამოუვა, რადგან ნაცვლად ათიათასობით გაჭირვებულის სოციალური პირობების გაუმჯობესებისა, ნაცვლად ახალგაზრდებისთვის უკეთესი მომავლისათვის ზრუნვისა, ნაცვლად „ქოლცენტრების“ მეშვეობით ხალხის ძარცვისა და პარტიული ყულაბის შევსებისა, რაზეც ჰელსინკის კომისიის დასკვნაც მეტყველებს, ნაცვლად ბათუმისთვის ეკოლოგიური საფრთხის შემცველი კუნძულის პროექტის უკანონო მშენებლობაზე უარის თქმისა, ნაცვლად საცობებისაგან ქალაქის განტვირთვისა, ნაცვლად კორუფციისა და ნეპოტიზმის აღმოფხვრისა, თაღლითური სქემით ცდილობენ ფონს გასვლას!

„ერთიანობა-ნაციონალური მოძრაობა“ აჭარის მოსახლეობასთან ერთად საკადრის პასუხს გასცემს 26 ოქტომბერს მავნებლურ ხელისუფლებას“, - აცხადებს „ერთიანობა-ნაციონალური მოძრაობის“ წევრი კახა მიქელაძე.