რუსეთის საჰაერო თავდაცვის სისტემებმა წუხელ ოთხი უკრაინული „ტოჩკა-უ“ ტიპის რაკეტა და ასზე მეტი დრონი ჩამოაგდო,- ინფორმაციას რუსული მედია ქვეყნის თავდაცვის სამინისტროზე დაყრდნობით ავრცელებს.

„როდესაც კიევის რეჟიმი ცდილობდა ტერორისტული თავდასხმის განხორციელებას უპილოტო საფრენი აპარატების და „ტოჩკა-უ“-ს ტაქტიკური რაკეტების გამოყენებით რუსეთის ფედერაციის ტერიტორიაზე არსებული სამიზნეების წინააღმდეგ, მორიგე საჰაერო თავდაცვის სისტემებმა ოთხი ტაქტიკური რაკეტა და 117 თვითმფრინავის ტიპის უპილოტო საფრენი აპარატი ჩამოაგდო“,- აღნიშნულია სამინისტროს მიერ გავრცელებულ ინფორმაციაში.

უწყების განმარტებით, 37 დრონი და ოთხი რაკეტა კურსკის ოლქის თავზე ჩამოაგდეს, ამდენივე დრონი ვორონეჟის ოლქის თავზე, 17 უპილოტო საფრენი აპარატი ბელგოროდის ოლქში გაანადგურეს, 11 - ნიჟნი ნოვგოროდში, 9 ვოლგოგრადში, 3 ბრიანსკის ოლქში, 2 ორიოლის ოლქში და ერთი როსტოვში.