რუსეთის სახელმწიფო სათათბიროს დეპუტატის, უშიშროების კომიტეტის წევრის, მიხაილ შერემეტინის განცხადებით, დასავლეთის ქვეყნებმა, რუსეთზე თავდასხმების განსახორციელებლად უკრაინისთვის იარაღის მიწოდებით, მსოფლიო, რეალურად, მესამე მსოფლიო ომის პირას მიიყვანეს.

„დასავლური მოდელის სამხედრო ტექნიკის არსებობის, უცხოური წარმოების საბრძოლო მასალითა და რაკეტებით სამოქალაქო ინფრასტრუქტურაზე თავდასხმების, რუსეთის ტერიტორიებზე თავდასხმაში უცხო სახელმწიფოების წარმომადგენლების მონაწილეობის უტყუარი მტკიცებულებებიდან გამომდინარე შეგვიძლია დავასკვნათ, რომ მსოფლიო მესამე მსოფლიო ომის ზღვარზეა, ომის, რომლის დაწყებაზე პასუხისმგებლობა მთლიანად დასავლეთის ქვეყნებს ეკისრებათ“, - აღნიშნა რუსმა დეპუტატმა.

მისი თქმით, ნატო-ს ქვეყნებმა, ფაქტობრივად, რუსეთზე თავდასხმის უფლება გასცეს და მარიონეტული კიევის რეჟიმის უკან იმალებიან.

შეგახსენებთ, უკრაინის შეიარაღებულმა ძალებმა 6 აგვისტოს კურსკის ოლქში შეტევითი ოპერაცია დაიწყო. ბრძოლები მიმდინარეობს კორენევსკის, სუჯანსკისა და ბელოვსკის რაიონებში. კურსკის ოლქის გუბერნატორის მოვალეობის შემსრულებელმა ალექსეი სმირნოვმა 12 აგვისტოს განაცხადა, რომ უკრაინის შეიარაღებული ძალები მის რეგიონში 28 დასახლებას აკონტროლებენ. უკრაინის შეიარაღებული ძალების მთავარსარდლის, ალექსანდრ სირსკის თქმით კი უკრაინელი ჯარისკაცები რუსეთის ტერიტორიაში 35 კილომეტრის სიღრმეში შევიდნენ და კურსკის ოლქში უკვე 82 დასახლებას აკონტროლებენ.