თინა ბოკუჩავა და გიორგი ვაშაძე ჩიკაგოში, ყრილობას დაესწრებიან, სადაც „დემოკრატიული პარტია“ პრეზიდენტობის კანდიდატად კამალა ჰარისს ოფიციალურად წარადგენს
„ერთიანი ნაციონალური მოძრაობის“ თავმჯდომარე თინა ბოკუჩავა, "ერთიანობა-ნაციონალური მოძრაობის" ერთ-ერთ ლიდერთან, „სტრატეგია აღმაშენებლის“ თავმჯდომარესთან, გიორგი ვაშაძესთან ერთად რამდენიმე დღიანი ვიზიტით აშშ-ში, ჩიკაგოში, დემოკრატიული პარტიის ყრილობაზე გაემგზავრა, სადაც კამალა ჰარისის, როგორც "დემოკრატიული პარტიის" პრეზიდენტობის კანდიდატის ოფიციალური წარდგენა მოხდება.
როგორც თინა ბოკუჩავამ განაცხადა, ვიზიტი არის ძალიან მნიშვნელოვანი იმისთვის, რომ „გავაღრმაოთ და აღვადგინოთ ურთიერთობა ამერიკა-საქართველოს შორის, რომელსაც სერიოზული ზიანი მიაყენა ივანიშვილის ანტიდასავლურმა პოლიტიკამ“.
„დღეს მივფრინავთ ჩიკაგოში, „დემოკრატიული პარტიის“ ყრილობაზე, სადაც კამალა ჰარისს ოფიციალურად წარადგენენ, როგორც დემოკრატიული პარტიის პრეზიდენტობის კანდიდატს.
ცოტა ხნის წინ, ასევე, ვიმყოფებოდი „რესპუბლიკური პარტიის“ ყრილობაზე, სადაც დონალდ ტრამპის წარდგენა მოხდა „რესპუბლიკური პარტიის" პრეზიდენტობის კანდიდატად. ეს არის ორი ყველაზე მნიშვნელოვანი წინასაარჩევნო ღონისძიება აშშ-ში, სადაც წარმოდგენილია სრულად ერთი მხრივ "რესპუბლიკური" და ახლა უკვე "დემოკრატიული პარტიის" ლიდერშიფი და რა თქმა უნდა, ეს არის ძალიან მნიშვნელოვანი იმისთვის, რომ ჩვენ გავაღრმაოთ და აღვადგინოთ ურთიერთობა ამერიკა-საქართველოს შორის, რომელსაც ძალიან სერიოზული ზიანი მიაყენა ივანიშვილის ანტიდასავლურმა პოლიტიკამ“, - განაცხადა „ერთიანი ნაციონალური მოძრაობის“ თავმჯდომარემ, თინა ბოკუჩავამ.
