ქობულეთში, სოფელ ოჩხამურში ადგილობრივებმა პროტესტის ნიშნად ცენტრალური საავტომობილო გზა გადაკეტეს. მოსახლეობის განცხადებით, მათი მთავარი მოთხოვნა იყო სოფელში სასმელი წყლის პრობლემის მოგვარება. ადგილობრივების განცხადებით, სასმელი წყალი ბოლო თვეებია არ მიეწოდებათ, რის გამოც სოფელში ცხოვრება გაუსაძლისი გახდა.

„ადგილობრივ ხელისუფლებას არაერთხელ მივმართეთ, მათ ისიც ვუთხარით, რომ გზას გადავკეტავდით, მაგრამ ჩვენი მოთხოვნა არ გაითვალისწინეს. ვერ გვეუბნებიან საბოლოოდ როდის მოგვარდება წყლის პრობლემა”,- აცხადებდნენ ადგილობრივები.

მოგვიანებით აქციის მონაწილეებმა განაცხადეს, რომ მათ ქობულეთის მუნიციპალიტეტის მერის პირველი მოადგილე ირაკლი ცეცხლაძე შეხვდა. მოსახლეობის განცხადებით, შეხვედრაზე პირობა დაიდო, რომ ხვალიდან სოფელში წყალმომარაგება აღდგება.

ამ დროისთვის ცენტრალურ საავტომობილო გზაზე სატრანსპორტო მოძრაობა აღდგა და საპროტესტო აქცია დასრულდა.