„კოალიცია ცვლილებისთვის“ - ჩვენ ვართ კოალიცია, რომლისთვისაც აზრის თავისუფლად გამოთქმა, კამათი და დისკუსია პრინციპულია, ძალადობა და ვანდალიზმი კი მიუღებელი
ჩვენ ვართ კოალიცია, რომლისთვისაც აზრის თავისუფლად გამოთქმა, კამათი და დისკუსია პრინციპულია, ძალადობა და ვანდალიზმი კი მიუღებელი,- ამის შესახებ „კოალიცია ცვლილებისთვის - გვარამია, მელია, გირჩი, დროას“ განცხადებაშია ნათქვამი.
როგორც კოალიციაში განმარტავენ, ქვეყნის მასშტაბით ოფისების გახსნისას ადგილი ჰქონდა თავდასხმისა და ვანდალიზმის ფაქტებს, რაც სამწუხაროა.
„უკანასკნელი რამდენიმე კვირის განმავლობაში, მთელ საქართველოში, „კოალიცია ცვლილებისთვის - გვარამია, მელია, გირჩი, დროას“ ოფისები გაიხსნა.
საქართველოს თითქმის ყველა კუთხეში ჩვენს უამრავ თანამოქალაქეს შევხვდით და მათგან იმ პრობლემების შესახებ მოვისმინეთ, რომლებსაც ყოველდღიურად აწყდებიან. ჩვენს თანამოქალაქეებს უკეთესი მომავლის იმედი აქვთ.
სამწუხაროდ, ადგილი ჰქონდა თავდასხმისა და ვანდალიზმის ფაქტებსაც. ჩვენ ვართ კოალიცია, რომლისთვისაც აზრის თავისუფლად გამოთქმა, კამათი და დისკუსია პრინციპულია, ძალადობა და ვანდალიზმი კი მიუღებელი. სწორედ ასეთი უნდა იყოს პოლიტიკაც. მსგავსი ქმედებები მხოლოდ სისუსტისა და შიშის გამოვლინებაა. ამ შიშს კი ჩვენი პოზიტიური ხედვები და იმ ცვლილების სურვილი იწვევს, რომელიც ქართველი ხალხის უმრავლესობას აქვს.
როგორც ჩანს, თქვენ ირჩევთ ვანდალიზმსა და ძალადობას, ხოლო ჩვენი არჩევანია, ვისაუბროთ ცვლილებასა და ჩვენი სამშობლოს მომავალზე, რომელსაც ვიცავთ და დავიცავთ“,- აღნიშნულია განცხადებაში.
