ინდოეთის პრემიერ-მინისტრმა, ნარენდრა მოდიმ კიევში გამართულ შეხვედრაზე უკრაინის პრეზიდენტს, ვოლოდიმირ ზელენსკის განუცხადა, რომ მზად არის, როგორც მეგობარმა, უკრაინაში მშვიდობის დამყარებაში თავისი პირადი როლი შეასრულოს.

Reuters-ის ინფორმაციით, ნარენდრა მოდიმ შეხვედრა მეგობრულ და ისტორიულ შეხვედრად შეაფასა და განაცხადა, რომ ინდოეთი მზად არის აქტიური წვლილი შეიტანოს მშვიდობის დამყარებაში.

ამასთან, ნარენდრა მოდიმ ვოლოდიმირ ზელენსკის განუცხადა, რომ დიალოგი უნდა დაიწყოს დროის დაკარგვის გარეშე და ორივე მხარე ერთად იჯდეს, რათა კონფლიქტიდან გამოსავლის გზა გამონახონ.

Reuters-ის ცნობით, ნარენდრა მოდიმ ზელენსკის ასევე განუცხადა, რომ მხარს უჭერს და პატივს სცემს უკრაინის ტერიტორიულ მთლიანობასა და სუვერენიტეტს, მაგრამ კონფლიქტის მოგვარების ერთადერთი გზა დიალოგი და დიპლომატიაა. მისივე თქმით, ნიუ-დელი არ არის ნეიტრალური ან გულგრილი დამკვირვებელი და ყოველთვის მშვიდობის მხარეს იდგა.