ზუგდიდის მერიის ახალგაზრდული პროექტების დაფინანსების კომისიამ, სამი პროექტი განიხილა და შესაბამისი რეკომენდაციები გასცა.

ამის შესახებ ინფორმაციას ზუგდიდის მერია ავრცელებს.

მათივე ცნობით, პროექტის - „ავატარი 2024" მიზანი ახალგაზრდებში სკაუტინგის, ჯანსაღი ცხოვრების წესის პოპულარიზაცია და სხვადასხვა უნარის განვითარების ხელშეწყობაა.

„სკაუტური ბანაკი „ავატარი 2024 " ავატარის თემატურად დაყოფილი ბანაკია. ბანაკის განმავლობაში გაიმართება სხვადასხვა შემეცნებითი და ფიზიკური აქტივობა, სკაუტური თამაშები და ტრენინგები, რომელიც ორიენტირებულია გუნდურ მუშაობაზე და ლიდერული უნარ-ჩვევების განვითარებაზე. ბანაკი ანაკლიაში მოეწყობა.

ა(ა)ი.პ რ.ე.ს.ე ორგანიზაციამ წარმოადგინა პროექტი „ნოელა", რომლის მიზანია ზუგდიდში მცხოვრები ახალგაზრდების ფიზიკური და სოციალური პოტენციალის გამოვლენა, თანამშრომლობის უნარების განვითარება. პროექტის ფარგლებში დაგეგმილია სხვადასხვა სპორტული ღონისძიებები.

პროექტი „ახალგაზრდული გაერთიანება მშვიდობისთვის" მიზნად ისახავს გამყოფ ხაზთან მცხოვრებ ახალგაზრდა გოგონების ჩართულობის გაზრდას გადაწყვეტილების მიღების პროცესში. პროექტის ფარგლებში სხვადასხვა შემეცნებითი, კულტურული და სპორტული აქტივობები განხორციელდება.

თუ ხარ ახალგაზრდული მიმართულებით მომუშავე ორგანიზაცია, გამოიყენე შესაძლებლობა და მიიღე 5000- ლარამდე დაფინანსება.

პროგრამაში მონაწილეობის უფლება აქვთ ახალგაზრდული მიმართულებით მომუშავე ორგანიზაციებს;

ახალგაზრდულ ორგანიზაციას შესაძლებლობა ექნება წელიწადში მხოლოდ ერთხელ ისარგებლოს აღნიშნული პროგრამით.

პროგრამის ფარგლებში სამიზნე ჯგუფის მინიმალურ ოდენობად სასურველია განისაზღვროს არანაკლებ 25 ახალგაზრდა.

პროგრამის მიზანია ახალგაზრდული მიმართულებით მომუშავე ორგანიზაციებმა საკუთარ გამოცდილებაზე დაყრდნობით შეიმუშაონ 14-დან 29 წლამდე ახალგაზრდებზე (ადგილობრივი/დევნილი) ორიენტირებული პროექტები.

დასაფინანსებელი პროექტი უნდა შეესაბამებოდეს საქართველოს ახალგაზრდული პოლიტიკის კონცეფციას.

კომისიაზე განსახილველად შეიძლება წარმოდგენილ იქნეს შემდეგი თემატიკის პროექტები: ჯანსაღი ცხოვრების წესის პოპულარიზაცია; გენდერული თანასწორობის მიღწევა; ახალგაზრდებში მეწარმეობის განვითარების ხელშეწყობა; ახალგაზრდების პიროვნული განვითარება არაფორმალური განათლების მიღების გზით; ინკლუზიური და თანასწორი განათლების უზრუნველყოფა ახალგაზრდებისთვის; სხვა ახალგაზრდულ საჭიროებებზე მორგებული პროექტები.

წარმოდგენილი პროექტის დაფინანსება/თანადაფინანსება უნდა განისაზღვროს არაუმეტეს 5 000 (ხუთი ათასი) ლარით“, - ნათქვამია ინფორმაციაში.