ახმეტის მუნიციპალიტეტში სტიქიის შედეგებს ითვლიან. ძირითადად დაზარალებულია პანკისის ხეობაში შემავალი სოფლები.
პირველადი ინფორმაციით, სახურავის გარეშე დარჩა 20-მდე სახლი, დასეტყვილია ვენახების ნაწილი და სასოფლო სამეურნეო სავარგულები.
ადგილობრივები ჰყვებიან, რომ უამინდობა რამდენიმე წუთი გრძელდებოდა, რამაც ისინი მოსავლის გარეშე დატოვა.
„ხედავთ რა მდგომარეობაა, თუკი რამე გვეთესა ყველაფერი განადგურდა - ლობიო, კიტრი, ბადრიჯანი, პომიდორი... უკვე დასაკრეფად იყო გამზადებული და სულ განადგურდა. აღარაფერი არ დარჩა. ამით ვცხოვრობდით, ეს შემოსავალი გვქონდა, ვყიდდით. ვიცით, რომ სტიქიაა და ხელს ვერავინ მიაფარებს, მაგრამ ვითხოვთ იქნებ სახელმწიფო ბადეების შეძენაში დაგვეხმაროს”, - ამბობს დაზარალებული ნინო ყაყიჩაშვილი.
გუშინდელმა ქარმა, ახმეტაში მოგლიჯა მრავალწლოვანი ხეები და ელექტროენერგიის ბოძებიც. ამ დრომდე ელექტროენერგია არ მიეწოდება მოსახლეობის ნაწილს.
ახმეტის მერის ალექსი ფიცხელაურის თქმით, ინფრასტრუქტურული ზარალის დათვლა უკვე დაიწყეს.
