„რუსული კანონი“ ეს არის იზოლაცია, უკიდურესი გაჭირვება, მონობა, ხოლო „რუსული კანონის“ გაუქმება და რეფორმების გატარება, ეს არის გზა ევროკავშირში გაწევრიანებისთვის, - ამის შესახებ „ერთიანობა-ნაციონალური მოძრაობის“ ერთ-ერთმა ლიდერმა, გიორგი ვაშაძემ განაცხადა.

ვაშაძის განმარტებით, „რუსული კანონის“ მიღების შემდეგ საქართველოს ევროინტეგრაციის პროცესი შეჩერდა.

„რუსული კანონის“ მიღების შემდეგ საქართველოს ევროინტეგრაციის პროცესი შეჩერდა. ეს ოფიციალურად დადასტურებული ფაქტია, შესაბამისად, კონსტიტუციის 78-ე მუხლი დარღვეულია. ამ ეტაპზე აქ განსახილველიც არაფერი არ არის, რომ ეს კანონი დაუყოვნებლივ უნდა შეჩერდეს, რომ 26 ოქტომბერს ეს კანონი უნდა გავაუქმოთ, რათა საქართველო ევროკავშირის წევრი გახდეს.

ბათუმში ვართ და ყველაზე კარგად აქ უბერავს ევროკავშირის სიო, შავი ზღვის გადმოსწვრივ. შესაბამისად, არა მხოლოდ სიო უნდა უბერავდეს, არამედ ეს ქვეყანა ევროკავშირის წევრი უნდა გახდეს. ეს გზა გადის „რუსული კანონის“ გაუქმებაზე, ამიტომ ყველა გაერთიანებულია ამ საკითხთან დაკავშირებით.

რაც შეეხება საკონსტიტუციო სასამართლოს, ჩვენ მოსამართლეებს, რაც არ უნდა შეგონება წავუკითხოთ, ზრდასრული ადამიანები არიან. ძალიან კარგად იციან, საქართველოს ეროვნული ინტერესის საწინააღმდეგო დოკუმენტს ხელს აწერენ, თუ საქართველოს ეროვნული ინტერესის მხარეს დგებიან, ეს მათი გადასაწყვეტია.

დანარჩენი 26 ოქტომბერს, წინ ევროპისკენ, წინ კეთილდღეობისკენ, წინ განვითარებისკენ.

„რუსული კანონი“ ეს არის იზოლაცია, უკიდურესი გაჭირვება, ეს არის მონობა, ხოლო „რუსული კანონის“ გაუქმება და რეფორმების გატარება, ეს არის გზა ევროკავშირში გაწევრიანებისთვის“, - განაცხადა გიორგი ვაშაძემ.