საქართველოს საჯარო სკოლებში პროფესიული განათლების პროგრამების განხორციელება იწყება. ამის შესახებ ინფორმაციას საქართველოს განათლების, მეცნიერებისა და ახალგაზრდობის სამინისტროს პრესსამსახური ავრცელებს.

როგორც გავრცელებულ განცხადებაშია ნათქვამი, პროფესიული საგანმანათლებლო პროგრამები საქართველოს მასშტაბით საპილოტედ შერჩეულ 20 საჯარო სკოლის ბაზაზე განხორციელდება

„საქართველოს განათლების, მეცნიერებისა და ახალგაზრდობის მინისტრის, გიორგი ამილახვრის ინიციატივით, პროფესიულ განათლებაზე ხელმისაწვდომობის ზრდის მიზნით, მიმდინარე წლიდან პროფესიული განათლება საჯარო სკოლებში შედის.

კერძოდ, სამინისტრო პროფესიული განათლებით დაინტერესებულ ახალგაზრდებს პირველად სთავაზობს ეროვნულ სასწავლო გეგმასთან ინტეგრირებულ პროფესიულ საგანმანათლებლო პროგრამებს, რომლებიც საქართველოს მასშტაბით საპილოტედ შერჩეულ 20 საჯარო სკოლის ბაზაზე განხორციელდება.

სამინისტრო, პროფესიული უნარების სააგენტოსთან ერთად, თითოეულ სკოლაში საინფორმაციო შეხვედრებს ღია კარის დღის პრინციპით გამართავს.

ინიციატივა მე-11 კლასის მოსწავლეებს უნიკალურ შესაძლებლობას აძლევს სკოლებშივე, თანამედროვე ინფრასტრუქტურით აღჭურვილ სასწავლო გარემოში, პრაქტიკაზე დაფუძნებით, ზოგადი განათლების პარალელურად დაეფლონ მოთხოვნად პროფესიას და მიიღონ, როგორც სრული ზოგადი განათლების დამადასტურებელი ატესტატი, ასევე, პროფესიული კვალიფიკაციის დამადასტურებელი დიპლომი. სწავლის დასრულების შემდეგ, ახალგაზრდებს შესაძლებლობა ექნებათ, დასაქმდნენ პროფესიით ან სურვილის შემთხვევაში გააგრძელონ სწავლა უმაღლესი განათლების საფეხურზე.

საპილოტე სკოლებში ინტეგრირებულ საგანმანათლებლო პროგრამებზე რეგისტრაცია, მოსწავლეებს სკოლის ბაზაზე, სკოლის ადმინისტრაციის მიერ განსაზღვრულ ვადებში, შეეძლებათ.

მოგეხსენებათ, 2023 წელს საქართველოს განათლების, მეცნიერებისა და ახალგაზრდობის მინისტრმა, გიორგი ამილახვარმა, საზოგადოებას პროფესიული განათლების განვითარების ახალი ხედვა წარუდგინა, რომლის თანახმად სახელმწიფომ მნიშვნელოვანი ინვესტიციები განახორციელა პროფესიულ განათლებაში. ახალი ინიციატივები მნიშვნელოვნად შეუწყობს ხელს საქართველოში შრომის ბაზრის მოთხოვნების შესაბამისი ადამიანური რესურსის მომზადებას და სამუშაო ადგილების შექმნას“, - ნათქვამია სამინისტროს განცხადებაში.