ძალიან მძიმეა, რომ პარლამენტის საგარეო ურთიერთობათა კომიტეტმა გერმანელ კოლეგებთან შეხვედრისთვის დრო ვერ გამონახა - გერმანიაში განათლებამიღებული ჩვენი ხელისუფლების წარმომადგენლები გერმანელ კოლეგებს ვერ ხვდებიან! - ამის შესახებ ჟურნალისტებს ოპოზიციონერმა დეპუტატმა თამარ კორძაიამ განუცხადა.

კორძაიას ინფორმაციით, გერმანიის ბუნდესტაგის საგარეო ურთიერთობათა კომიტეტის წარმომადგენლები საქართველოს პარლამენტის საგარეო ურთიერთობათა კომიტეტს უნდა შეხვედროდა, მაგრამ „მათთან შესახვედრად დრო მხოლოდ კომიტეტის თავმჯდომარემ ნიკოლოზ სამხარაძემ გამონახა“.

კორძაიას შეფასებით, „მომხდარი პარტნიორებთან მიმართებაში ხელისუფლების აგდებულ დამოკიდებულებაზე მიუთითებს“.

„გერმანიის ბუნდესტაგის წარმომადგენლებთან შეხვედრის ერთადერთი მიზანი საქართველოს ევროპული პერსპექტივის მხარდაჭერა და წინასაარჩევნო გარემოს შესახებ ინფორმაციის მიღება იყო როგორც ოპოზიციის, ასევე ხელისუფლების მხრიდან.

რა თქმა უნდა, ჩვენ მათ ავუხსენით, რომ წინასაარჩევნო გარემო არის უკიდურესად პოლარიზებული, ხელისუფლება კადრულობს ყველაფერს, მაგრამ გვჯერა, ქართველი ხალხის არჩევანის, რომელიც 26 ოქტომბერს არჩევანს სწორედ ევროინტეგრაციისა და საქართველოს დემოკრატიის გამარჯვებაზე გააკეთებს.

ჩვენ დასავლელი პარტნიორებისგან მივიღეთ მხარდაჭერა საქართველოს ევროინტეგრაციისკენ სწრაფვასთან და ქართველი ხალხის არჩევანთან დაკავშირებით“, - განაცხადა თამარ კორძაიამ.

დღეს, პარლამენტში, საპარლამენტო ოპოზიციური პოლიტიკური ჯგუფების წარმომადგენლები გერმანიის ბუნდესტაგის საგარეო ურთიერთობათა კომიტეტის ფრაქციების სპიკერებს შეხვდნენ. საქართველოში ვიზიტად მყოფ გერმანელ სტუმრებს მმართველი უმრავლესობიდან მხოლოდ საგარეო ურთიერთობა კომიტეტის თავმჯდომარე ნიკოლოზ სამხარაძე შეხვდა.