ზაჰესის დროებითი მოთავსების იზოლატორში „ერთიანი ნაციონალური მოძრაობიდან“ საკრებულოს წევრის, ირაკლი ეძგვერაძის გამოკითხვა დასრულდა.

როგორც იზოლატორიდან გამოსვლის შემდეგ ჟურნალისტებს ეძგვერაძის ადვოკატმა, ლაშა ტყეშელაძემ განუცხადა, სპეციალური საგამოძიებო სამსახურის გამომძიებელმა თავად ნახა, თუ რა დაზიანებები აღენიშნება დაკავებულს.

„ირაკლის დაზიანებები ეტყობა, ტანის სხვადასხვა მიდამოებში სილურჯეები აქვს, გამომძიებელმა თავის თვალით ნახა, ასევე ამოიღო დადგენილება, რომელიც მას იმ სამედიცინო დოკუმენტაციის ამოღებაში დაეხმარება, რომელიც იზოლატორში არსებობს, ყველაფერი აღწერილია. უფლებამოსილება უნდა შეუწყდეს იმ ადამიანს, ვინც ირაკლი ეძგვერაძეზე იძალადა, ამის ამსახველი კადრებიც არის, მისი სახელი და გვარიც ცნობილია [გიორგი ზუბადალაშვილი], ამის შემდეგ მისი გამოძიებაში დაბარება და ბრალის წარდგენა უნდა მოხდეს, რადგან მან სისხლის სამართლის დანაშაული ჩაიდინა. კოკა კაციტაძის უწყებას და პროკურატურას ვეტყოდი, გამოძიებობანას თამაშს თავი დაანებონ და გამოიძიონ საქმე. კოკა კაციტაძის უწყებას სხვა გზა არ აქვს, რომ ამ ადამიანს უფლებამოსილება არ შეუწყვიტოს და არ დააკავოს, რადგან მტკიცებულებები არსებობს და ვერ იტყვიან, რომ არ არსებობს", - განაცხადა ტყეშელაძე.