ოზურგეთის #60 -ე საოლქო-საარჩევნო კომისიის სხდომა, სადაც საუბნო საარჩევნო კომისიების ხელმძღვანელი პირებისა და წევრების არჩევა მიმდინარეობს ოლქში „ ერთიანობა - ნაციონალური მოძრაობის“ წარმომადგენელმა დავით მჟავანაძემ პროტესტის ნიშნად დატოვა.

მისი თქმით, ადამიანები, რომლებსაც აღნიშნულ პოზიციებზე ირჩევენ, „ქართულ ოცნებასთან“ დაკავშირებული პირები არიან.

მან განცხადების გაკეთება სცადა, თუმცა ამის საშუალება საოლქო საარჩევნო კომისიის თავმჯდომარემ არ მისცა, რასაც სიტყვიერი დაპირისპირება მოჰყვა.

„რაც დღეს ოზურგეთის #60 -ე საოლქო-საარჩევნო კომისიაში ხდება მას არანაირი კავშირი არა აქვს დემოკრატიასთან, არც დემოკრატიული პრინციპებით არჩევნების ჩატარებასთან და ერთადერთი რაც შეიძლება ამას ვუწოდოთ, ეს არის „ ქართული ოცნების“ მიერ მოწოდებული ადამიანებით სიის დაკომპლექტება. შევეცადე ამის შესახებ მესაუბრა კომისიაზე და პროტესტის ნიშნად დავტოვე, რადგან არ მომცეს ამაზე საუბრის საშუალება. მათ არ უნდათ საზოგადოებამ გაიგოს სიმართლე. თითქოს ყველაფერი კარგად არის, თითქოს ყველაფერი დემოკრატიულად მიმდინარეობს. მინდოდა მესაუბრა რამდენიმე ადამიანზე, რომლებზეც ამბობენ თითქოს დამოუკიდებელი წევრები არიან, მაგრამ რეალურად ასე არ არის. კომისიები დაკომპლექტებულია „ქართული ოცნების“ ნათესავებით, უშუალოდ თანამდებობის პირებითა და მათი ოჯახის წევრებით. ეს ყველაფერი ემსახურება ერთადერთ მიზანს, გააყალბონ არჩევნები და მაქსიმალურად გააკეთონ ყველაფერი იმისთვის, რომ კიდევ ერთხელ დარჩეს ქვეყნის მმართველობაში რუსი ოლიგარქი ივანიშვილი”, - განაცხადა დავით მჟავანაძემ.