ის, რომ კეზერაშვილი დაკავებული იყო პენსიონერების ძარცვით, ეს ჩვენი ქვეყნის მოსახლეობისთვის ახალი არ არის,- ამის შესახებ თბილისის მერმა, კახა კალაძემ ე.წ. ქოლ ცენტრების საქმესთან დაკავშირებით განაცხადა.

როგორც კალაძემ ჟურნალისტებს განუცხადა, ამიტომ არის გამჭვირვალობა მნიშვნელოვანი, რომ ყველა არასამთავრობო ორგანიზაციამ წარმოადგინოს დეკლარაცია და საზოგადოებას წარუდგინოს, თუ ვისგან იღებს თანხებს და რა კონკრეტულ პროექტებში იხარჯება.

„არა მხოლოდ ქვეყნის მოსახლეობამ, მთელმა მსოფლიომ და ევროპამ გაიგო, თუ ვინ იდგა ამ სქემის უკან, რა დანაშაულებრივი ჯგუფი იყო. ძალიან მძიმეა ეს ყველაფერი. კიდევ უფრო მძიმეა, რომ არსებობს ვარაუდი, ეს თანხები მიდის პოლიტიკაში, ფინანსდებიან კონკრეტული არასამთავრობო ორგანიზაციები და არასამთავრობო ორგანიზაციების გავლით კონკრეტული პარტიები. რა თქმა უნდა, ეს უმძიმესია, ამიტომ არის გამჭვირვალობა მნიშვნელოვანი იმისთვის, რომ ყველა არასამთავრობო ორგანიზაციამ წარმოადგინოს დეკლარაცია და საზოგადოებას წარუდგინოს, თუ ვისგან იღებს თანხებს და რა კონკრეტულ პროექტებში იხარჯება. ამიტომ არის გამჭვირვალობა მნიშვნელოვანი“,-განაცხადა კალაძემ.

შეგახსენებთ, რომ საქართველოს პროკურატურის ცნობით, გამოძიების მიერ საბანკო სექტორიდან ამოღებული ინფორმაციის ანალიზით დგინდება, რომ შპს ,,მორგან ლიმიტედის“ სახელით მოქმედი თაღლითური ქოლ-ცენტრის ერთ-ერთმა ხელმძღვანელმა პირმა, რომელიც გატარებული ღონისძიების ფარგლებში მოსამართლის განჩინების საფუძველზე დაკავებულია, ევროპელი მოსახლეობისგან თანხების თაღლითურად დაუფლების პერიოდში ჯამში მილიონ დოლარზე მეტი თანხა ჩარიცხა დავით კეზერაშვილის, კეზერაშვილის დის და კეზერაშვილის დის შვილის საბანკო ანგარიშებზე.