თბილისის მერის კახა კალაძის განცხადებით, მას უკრაინელი მეგობრებისგან აქვს ინფორმაცია, რომ საქართველოდან უკრაინის საქმეთა დროებითი რწმუნებული გაწვევის გადაწყვეტილება სარეცხ მანქანას უკავშირდება.

როგორც კალაძემ ჟურნალისტებს განუცხადა, ამ საკითხით ყველა შოკირებული იყო.

„მეც მაქვს აღნიშნული ინფორმაცია სარეცხ მანქანასთან დაკავშირებით, თუმცა, ეს ინფორმაცია საქართველოდან არ გამიგია, უკრაინიდან, ჩემი მეგობრებიდან გავიგე. ყველა შოკირებული იყო. თემა რა იყო, უბრალოდ რომ იცოდეთ - ჩართვა იყო სხვადასხვა ქვეყნებიდან უკრაინის საგარეო საქმეთა სამინისტროში, როგორც მომიყვნენ ჩემმა მეგობრებმა უკრაინიდან, იმას გეუბნებით. ყველა ჰყვებოდა, თუ რა საჭიროება ჰქონდათ, დახმარება, ეს, ის და საქართველოდან სარეცხი მანქანა მოითხოვეს. აი, ეს იყო თემა“, - განაცხადა კალაძემ.

საქართველოს პრემიერ-მინისტრმა ირაკლი კობახიძემ საქართველოდან უკრაინის საქმეთა დროებითი რწმუნებული გაწვევის გადაწყვეტილება განმარტა.

პრემიერის თქმით, უკრაინის საქმეთა დროებითი რწმუნებულის გაწვევა უკავშირდება ისეთი საყოფაცხოვრებო ნივთის შეძენას, რომელიც მას, უკრაინის ხელისუფლების მოსაზრებით, ომის პირობებში არ უნდა შეეძინა, საუბარია სარეცხ მანქანებზე.

ამასთან, როგორც კობახიძემ აღნიშნა, ამ ფაქტისგან განსხვავებით, 2021 წელს საქართველოდან ელჩის გაწვევა ნამდვილად პოლიტიკური აქტი იყო.

„რეალურად ეს არ არის, ჩემი ინფორმაციით, იმ ტიპის გადაწყვეტილება რაც თავის დროზე 2021 წელს იქნა მიღებული ელჩის გაწვევასთან დაკავშირებით. მაშინ გახსოვთ, ეს იყო სუფთა პოლიტიკური გადაწყვეტილება. მაშინ უკრაინის ხელისუფლებამ იმის გამო, რომ ჩვენ არ შევუერთდით სანქციებს და არ გავგზავნეთ, მთავრობის ოფიციალური თანხმობით, მებრძოლი მოხალისეები უკრაინაში, გაიწვია საქართველოდან ელჩი, ეს იყო პოლიტიკური აქტი. ამ შემთხვევაში, ჩვენი ინფორმაციით, ეს არ არის პოლიტიკური აქტი, კონკრეტულმა წარმომადგენელმა, თუ არ ვცდები, დიპლომატიური სტატუსი აქვს მასაც, შეიძინა საყოფაცხოვრებო ნივთები და ეს ჩაითვალა არაადეკვატურად მიმდინარე ომის ფონზე, ეს გახდა მისი გაწვევის მიზეზი, ეს არის ის ინფორმაცია, რაც ჩვენს გვაქვს. ანუ განსხვავებით ელჩის გაწვევისგან, ეს არ არის პოლიტიკური აქტი, უკავშირდება კონკრეტული საელჩოს წარმომადგენლის მიერ ისეთ საყოფაცხოვრებო ნივთის შეძენას, რომელიც მას უკრაინის ხელისუფლების მოსაზრებით არ უნდა შეეძინა ომის პირობებში სარეცხის მანქანებზეა საუბარი“, - განაცხადა კობახიძემ.